Aizawl: Mizoram district hrang hrangah Saw Mill (thingzaina hmunpui) 15 din tumin hma lak mek a ni a, hei hi tih hlawhtlin anih hun chuan mipui ten an tangkaipui hle beisei a nih thu kan dawng. Zalen palaiin a biaknaah Chief Conservator of Forests Lalthangliana Murray, IFS chuan Supreme Court thupek anih vanga Saw Mill chu din tum an ni tih a sawi a, ruahmanna thui tak an kalpui tawh nia sawiin an rawtna te sawrkar laipuiin a pawm veleh hmalak tan nghal an tum tih a sawi. Saw Mill awm vanga mipui ten an hlawkpui theihte sawiin Chief Conservator of Forests chuan, "Mill awmlohna hmun-ah chuan thinglian zai theih a ni lo a, wood based industry pawh din theih a ni lo bawk a. Mill hi dan ang taka din anih chuan teak leh thing lian tak tak te zai a ni ang a, India ram khawi hmunah pawh dan ang takin thawnchhuah a ni ang a, huan neitute pawhin an thing te man to zawkin an hralh thei dawn a ni," a ti. CCF chuan tun dinhmunah teak huan neite pawhin an thing te hralh thin bawk mahse a leitu lamin nasa taka taka an nep thin avangin man tlawm te te chauhvin an hralh niin a sawi bawk. Saw Mill hi private hnenah pek tum a ni a. District tina Mill dah tum anih chhan hi mipuite awlsam zawkna tur anih vang a ni a, Saw Mill awmlohna district chuan district danga mi thing an lei a ngai dawn a. Dan ang takin wood base industry pawh din theih a ni dawn a ni.