ZALEN December 1, 2025: Mizoram Agricultural Marketing Board (MAMB) vawiina an chairman Chief Minister hova thukhawm chuan Sawhthing, Hmunphiah, Aieng leh Mizo Hmarchha lei hun tur an bithliah a, Buhhum chu lei tan a nih tawh an ti.

MAMB chuan Sawhthing lei tan ni atan February ni 2, 2026 chu an ruat a. Hmunphiah hi February leh March 2026 chhunga lei a ni ang a, Aieng leh Mizo Hmarcha hi February atanga April thla chhung lei a ni ang a, Buhhum hi lei tan tawhin kum thar January thleng lei a ni ang an ti.

MAMB thukhawm chuan Secondary Collection Centre (SCC) 65 ten rualkhai taka a man (a rate) an kalpui theih dan tur ruahmanna siam a ni tawh dawn bakah SCC leh DAMC te hnenah an chet velna sum mamawh zualpui pek an ni ang a, Buffer stock a awm tawh lo vang a, Sawhthing Society member-te ta chauh lei a ni ang an ti. Sawhthing Society, Cooperative Society a inziaklut tlak te chu lo inziaklut vek turin beisei an ni an ti bawk.

State pawn atanga Sawhthing Slice Dry lei duh an tam thin avangin Mizo Innovator pahnihte thilsiam Sawhthing channa leh ur rona khawl Rapchung Technology leh Tapchhak Technology khawlte chu Handholding Scheme atanga lei an rel a, a enkawltu turte chu an hnathawh that dan a zira ngaihtuah a ni ang tiin an rel.

Hmunphiah ro hi sawrkar rate-in ZOHANDCO in a lei leh dawn a, midang hnena sawrkar rate aia tova hralhna hre tan hralh theih reng a ni a, sawrkar rate aia tlawma hralhte hnenah support price pek an ni lo vang. A chhan chu ZOHANDCO in sawrkar rate-a a lei vek theih dawn vang a ni. Mimal leh sumdawng hmunphiah leitute chuan Land Resources, Soil & Water Conservation Department hnenah certificate of origin lak tur a ni a, chumi hmang chuan EF&CC-ah transit pass lak leh ngei tur a ni.