ZALEN May 16, 2026 : Chief Minister Lalduhoma chuan vawiin khan Samthang Community Hall-ah khawtlang mipuite buatsaih Sawhthing Kut a hmanpui a, Sawhthing hi ram leilung tichhe tam lo zawng leh a hralhna lama hlawkpui zawk theih nan Organic uar a tul a. A processing kalpui a tul bawk a. Inbuatsaih chho zel a ni, a ti.

Chief Minister chuan, "Ka politics zin kawng leh sawhthing market hian inanna tak a nei a, a kawng a bum boh a. Mahse, Pathian hun ruat lo thleng hi tuma dan rual a ni lo. Nikumah inzir chawpin hma kan la a, harsatna tam tak kan tawk nain kan pek chhuah tur Support Price zawng zawng kan pe chhuak thei.

"Kuminah pawh a tir lamah a rate hi a tha mai lo va. Kan hun tiam thlen hmaa a rate hniama lo hralh ta mai khua an lo awm bawk a. Nimahsela, Pathian zarah kan tum ang ngeiin kan hun tiam atangin kan lei tan leh a ni. Tunah phei chuan kan beisei phak bakin sawhthing rate a rawn sang ta a. Hei hi kan tih a ni lo va engkim chunga roreltu Pathian hnathawh a ni tih kan hria a ni," a ti.

Hmasawnna an hmuh te sawiin Chief Minister chuan, "Mizoram sawhthing hi a quality a tha a, damdawi anga hman theih a ni a, essential oil a ngah a, fibre a nei tlem si a, Ministry of DoNER-ah Unique Selling Proposition (USP) min kalpui turin kan dil a. Min rawn phalsak ta a."

"USP - Sustainable Cultivation & Value Chain Management Project kan siam a. Project Cost hi Vaibelchhe 190 vel a ni a. A processing Unit dinna tur bik atan Vaibelchhe 30.13. kan ruahman a. Nilaini khan a project hawnna hi online-in DoNER Minister nen kan nei a, a hawnna programme kan hman zawh rual hian Processing Unit kan dinna tur bik sum Vaibelchhe 30.13 hi an rawn sanction nghal a ni. Hetiang taka pawisa sanction rang hi sawi tur a vang khawp mai," a ti.

Sawhthing sawngbawl a tul thu sawiin, "Champhai district hi Sawhthing kan thar tamna district a nih angin Mualkawi-ah Processing Unit pui ber din a, a chawmtu tur a tenau deuh zawk pathum - Tualcheng, Vaphai leh Zotlang-ah din kan rilruk a. He lai bial mipui zawng zawngten in chhawr phak vek dawn a ni.

"Sawhthing market a that tial tial theih nan sawhthing hrisel kan thar a ngai a, kan ram leilung a tihchhiat nasat loh nan sustainable cultivation kan kalpui a ngai a. Chumi lam hawi zawnga kal hret hret a, engtikah emaw chuan Organic state-a inpuan kan duh a ni. A pulunga kan hralh ringawt hian bo thlau a tam thin a, a hlawk tawk lo va. A sawngbawlna hi hmun hrang hrangah neih chhoh zel kan tum," a ti.

Samthang-ah hian chhungkua 230 vel a cheng mek a, a tam zawk hian lo neiin ei an zawng a, Sawhthing bakah fur Zikhlum an ching nasa bawk a ni.