ZALEN Feb 25, 2026: Agriculture & Farmers' Welfare department changtu minister PC Vanlalruata'n, sawrkar support price tello a sawhthing kg. khat Rs. 50 aia to a hralh theih chu an thil tum a ni tih house a hrilh.

Vawiin Assembly budget session zawhna leh chhanna hunah member te zawhna chhanga he thu hi sawiin, PC Vanlalruata chuan, Mizoram hmun hrang hrangah sawhthing Secondary Collection Centre 64 a awm tih a sawi a, chung zinga Cherhlun SCC, Khuangleng SCC, W Phaileng SCC leh Tuipang SCC ah te sawhthing lei mek a nih thu a sawi.

Minister chuan nikum lam a sawrkarin direct purchase a sawhthing a lei ang chu kuminah sawrkarin a tlin tawh lo tih sawi bawkin, price support kaltlangin February ni 2, 2026 atanga sawhthing lei tan turin ruahmanna an siam thu a sawi bawk.

Minister in house a hrilh danin, sawrkarin sawhthing kg. ah floor price Rs. 40-45 a siam a, buyer lamin Rs. 32-33 ten an dawn. Buyer te an tan tlat avangin Rs. 30-35 ah tihhniam leh a ni. Hemi hnu hian buyer ten Rs. 27 ten an dawn leh. "Kan buyer te hi an fing khawp a, an tangrual tlat thin a, chu chuan sawrkarah harsatna min siam nasa hle," PC Vanlalruata chuan a ti.

#ZalenNews

Agriculture & Farmers' Welfare minister chuan, Mizoram a thar chhuah sawhthing quality tha tak chu man tlawm taka hralh an remti lo a, an phal vak lo tih sawiin, chu chu farmer lam te an zirtir mek thu leh tlawm te te a hralh lo remti lo turin farmer te pawh an duh thu a sawi.