ZALEN January 11, 2026: Mizoram sawrkarin nikum December 12, 2025 thleng khan sawhthing quintal 3,437 leina (support price) atan Rs. vaibelchhe 138 a hmang tawh a. Sawhthing hralhna atanga sum hmuh let chu Rs. vaibelchhe 12 a ni.

Directorate of Agriculture & Farmers’ Welfare department SPIO-in RTI zawhna a chhanna atanga a lan danin nikum chhung (December 12, 2025 thleng) khan sawhthing leina atan vbc 138 sen a nih laiin a hralhna atangin Rs. 12,78,07,290 hmuh let a ni.

Sawhthing hi sawrkarin secondary collection centre (SCC) 62-ah kg khat Rs. 50 zelin a leisak tih SPIO chuan sawi bawkin SCC leh buffer stock point-te hian lilam (auction notice) siamin a chhang sang apiang hnenah hralh chhuah ngal zel niin a hralh chhuahna rate hi kg-ah Rs. 10 atanga Rs. 30 inkar a ni tih RTI chhannaah chuan tar lan a ni.

SPIO chuan sawhthing lei a nih theihna atana senso hrang hrang tar langin administrative cost-ah Rs. 37,40,445; transportation cost-ah Rs. 99,05,771, operational cost-ah Rs. 1,87,30,391 hman a ni tih tar langin sawrkarin sawhthing a lei hi hralh zawh vek tawh niin a bâng a awm lo tih a sawi a. Sawhthing leina (support price) hi a dawngtu tur dik tak, kuthnathawktute hnenah pek kim thawkhat an ni tawh tih a sawi a; amaherawhchu, SCC leh district agricultural marketing committee (DAMC)-ten tihhmaih palh leh siam that ngai an nei nual a. Siam that leh tih dik hna thawh mek niin pek kim loh zat leh pek leh tur awm zat chiang taka sawi theih a la ni lo tih a tar lang a. Sawrkarin sawhthing a lei zingah sawngnawi, khawro leh hralh tlak loh paih quintal 2,386 a awm tih a sawi bawk.

Kum 2023-2024 financial year chhung khan thlai thar leina atan sawrkarin sum vbc 110 a dah.

Thlai thar leina tur sum hi a hranga dah tawh lovin hand holding scheme hnuaia budget dah atangin a mamawh ang zelin support price hi pek chhuah tawh tum a ni.

Nikum chhungin sawrkarin buh hum quintal 1,473 leh hmunphiah ro quintal 2,498 chu ZOHANDCO kal tlangin a lei. 

Mizoram sawrkar thuchhuah no. 2412/2025-2026 tar lan danin sawrkar chuan February, 2026 atangin sawhthing hi a lei chhunzawm leh dawn.