ZALEN August 28, 2025 : Mizoram sawrkarin sawhthing leinan Rs. Vbc. 70.19 (support price atan) a seng tawh a. Hetihlai hian sum hmuhlet erawh Rs. Vbc. 12.78 a ni.

Vawiin assembly session zawhna leh chhanna hunah memberte zawhna chhanga he thu hi sawiin, A&FW department minister PC Vanlalruata chuan, Mizoram sawrkar chuan kum 2024 chhung sawhthing lei a nei loa, kum 2025 ah February ni 20 leh June ni 30 inkar chhung khan lei a ni tih a sawi.

A&FW minister tarlan danin, August ni 16, 2025 thlenga report an khaikhawm ah chuan quintal 3,45,932 lei tawh a ni. Phase-1 : February ni 20 leh April ni 20, 2025 chhung khan kg. khat Rs. 50/- zelin Secondary Collection Centre (SCC) ah a lei a. Phase-2 : April ni 21 leh June ni 30, 2025 chhunga SCC a lei chu company/sumdawng hnenah auction hmangin an hralhchhuak a, kg. khat Rs. 50/- a tling lohna zawng (support price) hi sawrkarin sawhthing hralhtu farmer hnenah a pe.

Sawhthing leikhawm te hi auction notice tihchhuah niin a chhang sang apiang hnenah hralhchhuah leh nghal zel an ni. Sawrkarin sawhthing lei nan a sum a sen hmuh kir leh vek a ni lo a. Sawhthing lei nana sawrkarin sum a sen atang hian Rs. Vbc. 12.78 hmuh let a ni.

#ZalenNews