ZALEN Feb 18, 2026: Nikum 2025 chhunga sawhthing leina Rs. Vbc. 4-5 chingpen nia sawi kha sum release hma-a hum hman anih avangin hmuh let tur a awm lo tih Agriculture & Farmers Welfare minister PC Vanlalruatan house a hrilh.

Vawiin Assembly Budget Session zawhna leh chhanna hunah memberte zawhna chhangin he thu hi a sawi a, minister chuan, Secondary Collection Centre thenkhat atangin sawhthing hralhna data diklo upload vanga sawrkar price support pek tur pung ta hluai kha a nih thu sawiin, hei hi sum release a nih hma-a finfiah a nih thu leh data diklo pawh siamthat a nih thu a sawi. "Sum chingpen tur pawh hum hman a ni a. Sum chingpen a awm hmanloh avangin tu chungah mah action lak a ni lo." a ti bawk.

Agriculture & Farmers Welfare minister chuan, anmahni thar chhuah ni lo, hmun dang atanga sawhthing an lakkawm, anmahni thar chhuah anga hralh tumna te tarlangin, chungte chu Farkawn Secondary Collection Centre (SCC), Khuangleng SCC, Cold Storage New Champhai SCC leh Ramhrangkawn SCC, Champhai te an nih thu a sawi bawk.

#ZalenNews