ZALEN September 22, 2024 : Kumin June, July leh August thlaa sawhthing tâm chuan Mizorama kuthnathawk chhungkua 8,507 a nghawng a. Kumin hian Mizoram chuan sawhthing quintal nuai 10 chuang a thar beisei a ni.

ZALEN-in Horticulture department thawktute hnen atanga thu a dawn danin kuminah hian Mizoram pumah sawhthing ching hi chhungkaw 23,799 an awm a, heng zinga chhungkaw 8,507 chu natna hrikin a tibuai a. August 16-30, 2024 inkar chhung khan sawhthing tâm enkawl leh beih let dan tur mipuite hnena zirtirna, ‘Operation Ginger 2024’ feh chhuah runpui neih a ni a. Hemi hun chhung hian horticulture department thawktute chuan kuthnathawktute hnenah him zawka sawhthing chin dan, sawhthing rannungin a ei/bawm enkawl dan bakah inven dan te an zirtir a ni.

Mipui hnena zirtirna an kalpui chu a hlawk hle nia sawiin horticulture department thawktute chuan, “Kan hlawhtlinna hi 60%-100% inkar niin kan ngai a. Sawhthing thenkhat chu an rawn chawrno leh hlup hlup tawh a, kan lawm hle a ni,” an ti a. Sawhthing chingtu zingah a tir atanga ‘tâm’ venna kap nghalte chuan an tuar nep deuh niin an sawi bawk.

Sawhthing tâm chhan ZALEN zawhna chhangin horticulture dept. thawkte chuan, “Thlai hrim hrim hi chin tam a nih chuan natna hrik a keng tel ve hrim hrim a. Mizorama sawhthing tâm pawh hi fur hunlai hi an inthlahpun hun a ni a, kan thlai chinna hmun hi tlangram ni mah se ruah tui a tam vangin lei a hnawng a, an inthlahpung chak a ni,” an ti a. Sawhthing him taka ching tur chuan a chi chiah uluk a ngai tih an sawi bawk.

Mizoram sawrkarin thlai thlanbik chi li-te lei a tum vangin kuminah hian sawhthing, aieng, hmarcha leh hmunphiah ching an tam hle a. Hriat theih chinah sawhthing ching hi chhungkaw 25,154 awmin quintal 10,84,975 thar chhuah beisei a ni a. Aieng hi chhungkaw 3,414 atangin quintal 77,492, hmarchate ching chhungkaw 8,517 atangin quintal 36,774 leh hmunphiah chingtu chhungkaw 8,500 atangin quintal 1,20,000 thar chhuah beisei a ni.