Aizawl: Mizoram sawrkar chuan Bawngkawn kawngkual zim lai, Chaltlang atanga Bawngkawn thlen dawn kawngkual tih zauh hna chu tunkar chhung hian thawh tan an tum. UD&PA hotute hnen atanga Zalen thudawn danin kawng zauhna tura mi mal ram lakna tur chu tihfel tep a ni tawh a, tun kar lo awm tur chhung hian PWD, P&E, PHE leh BSNL ten thenfai ngai leh enfel ngaite enfelin hna tan tum a ni tih an sawi a. helai kawng hi zauh theih a nih chuan Sairang road lama lirthei kal tur tan nasa takin awlsamna a siam dawn a ni. Helai kawng zauh hna hi NEDP sum hmanga thawh a ni dawn a, UD&PA chu nodal department an ni ang. Thudawn danin Bawngkawn pengthuam zauhna atan hian MNF sawrkar lai (2005) khan he laia in neitu Lalthai w/o Lalrinmawia ram square metre 113.04 a zau chu lei a ni a, sawrkar ram hi MNF President hmingin land lease no. 117 of 2005 siam a ni leh a. Mahse he ram hi kum 2015 khan Dr. Don Sapremsanga Halliday chuan Lalrodingi d/o R Lalthanliana, Mission Veng hnenah nuai 150-in a hralh leh a ni. Sawrkar chuan Lalrodingi hnenah hian zangnadawmna atan nuai 150 hi pek leh a remti a, sum pek tur hi budget allocation ah pawh telh a ni tawh a. Zirtawpni kalta atang khan in thiah hna pawh hi thawh tan a ni tawh a ni.