Aizawl; Khawzawl district a Ngaizawl khaw mipui lungawilo in an khaw kawng, PMGSY road Alkatra luan hna leh white topping hna thawktuten buk an siam, tunhnaia an thiahsak hnuah Mizoram sawr-kar chuan hnathawk-tu tur contractor dang a ruat thar tawh nia thudawn a ni.

ZALEN thudawn danin, Ngaizawl khaw kawng siam hna chu a tir a contractor thlan tawh sa hming pu zui thoin, a hnuaia thawk turin Zoremtluanga, Zemabawk, Aizawl (Chawngthu Construction) thlan a ni a, hnathawktu tur hian February 4, 2022 khan Ngaizawl khua tlawhin, NGO hrang hrangte nen inkawmna an nei. Hnathawktu tur hian tun kar chho atang hian hnathawhna tur bungruate la lutin, remchang hmasa berah hna a thawk tan dawn nia thudawn a ni.

Media hrang hranga tar lan tawh angin, Khawzawl leh Ngaizawl inkar kawng, PMGSY kawngpui km 13.4-a thui black topping leh white topping hna chu First class contractor Collin Lalsangpuii, Aizawl Electric veng hminga thawh a ni a, a hnuaiah Romuanpuii Zadeng chuan kawngpui siam hna hi a thawk.

Kum 2017 atanga thawk tanin kum li leh thla thum chhung an thawh hnuah km 3.7-a thui chauh an la thawk a, hri leng avanga an hna hi thawk tha thei lova insawiin, an zawh hun tura ruahmanah an zawh theih dawn loh avangin hnathawh hun pawh seisak an dil a, an dil angin kumin March thlaa tawp tawh tur chu September, 2022 thleng pawh seisak a ni. Heti chung hian hun pek belh chhungah a zo hman dawn lo niah Ngaizawl khaw NGO Coordination committee leh VC te chuan an ngai a ni.

Hengte avang hian Ngaizawl khaw mipui lungawi lo chuan an khaw kalkawng, PMGSY Road Alkatra luan hna leh white topping hna thawktuten buk an siam chu February 21, 2022 khan an thiahsak.

He thil thleng chungchangah hian contractor hming hawh a hnathawktu Romuanpuii Zadeng chuan Ngaizawl NGO hruaitute leh VCP lakah February 25, 2022 khan FIR a thehlut a, khawtlang hruaitute hi police ten koin February 28, 2022 khan Khawzawl Police Station-ah an inlan a ni.