Aizawl July 14, 2022 : Department of Personnel and Administrative Reforms (DP&AP) leh Health Department te chuan sawrkar laka tiamchin awmlova nuar National Health Mission Employee Union Mizoram (NEUM) te chungchanga an hmalak dan tur an sawi a, Sawrkar a khawng tawh ang, an ti

National Health Mission (NHM) hnuaia hnathawk NEUM hi Health Secretary Esther Lalruatkimi chuan, appointment order pek ni lovin engagement order pek an ni zawk, a ti a, an hna hi kum khat atana tih zel niin an hnathawh dan a zira kum khat ang zela chhawr zel an ni tih a sawi. Hna thawk tura lak an nih hma hian intiamkamna pawh ziah vek a nih thu leh Controlling officer ten an hnathawh dan an report dan ang zela chawlhtir theih an nih thu a sawi bawk.

Health Secretary chuan NHM hnuaia hnathawk te hian hna an thawk em tih report Controlling Officer te atanga an hmuh atangin an chungchang hi ngaihtuah a nih tur thu a sawi a, "Sawrkar a khawng tawh ang," tiin an hmalakna tur erawh mimala sawi theih a ni lo, tiin, "Tun dinhmunah NHM hnathawk te dinhmun tur hi tuma sawi theih a ni lo," a ti. "An thu leh hla hi kan ngaichang reng zawk a ni," tiin, a theih chinah chuan theihtawp an chhuah pui tih a sawi bawk.

SAD Conference Hall-a chanchinthar lakhawmtute an kawmnaah hian DP&AR Secretary Lalramnghaka leh Health Secretary Esther Lalruatkima te chuan thil awmzia an sawifiah a, NEUM te nawrhna kalpui neih mek chu awmze nei lo, chinfel mai theih lo tih an sawi a, Tun dinhmunah Study Group pawhin Report sawrkar-ah thehlut tawh pawh ni se, financial implications leh legal flaws a awm theih leh theih loh zirchian zawh a la ni lo hrim hrim a ni, an ti.

Sawrkar lam chuan NHM hnuaia CSS a thawk mi 2000 bakah hian department hrang hrang 16-ah CSS hnuaia thawk engemaw zat an awm a, Mizoram sawrkar hnuaiah hian CSS hnuaia thawk mi 10645 an awm tih an sawi a, NHM hnuaia hnathawk ringawt buaipui bik theih an ni lo, an ti. Hlawh lak mumal loh chungchangah CSS hnuaia hnathawk te hi hlawh lak mumal lak loh chang nei vek niin an sawi.

Health department secretary chuan, "Harsatna tam tak karah an hlawh lak theih loh April & May 2022 hlawh pawh July 8, 2022-ah an bank account-ah thun sak an ni a, June leh a hnulam zel atan pawh tunah hian ngawrh taka hmalak mek a ni," a ti.

"Sawrkarin theihtawp a chhuah sak mek avangin an nawrhna titawp a July 14, 2022 atanga an hna te a pangngaia zawm vek tur leh thupek zawm lo te chungah action lak a ni ang, tiin ni 13.7.2022 khan sorkarin a hriattir tawh a ni," a ti bawk.