ZALEN February 4, 2026 : School Education Department-in thla tina an chhuah thin Meichher Award 2025 chu vawiin khan School Education Directorate Conference Hall-ah sem a ni. He huna khuallian Director School Education Angela Zothanpuii chuan Meichher chu Mizo thu leh hlaa article lar lo chhuahna a ni a, thuziaktute pawh mi chhuanawm an ni a ti.

Meichher Editor ni mek TC Lalremsiama Editor-in Meichher chanchinbu hi “ZORAM ÊNG' tih hming vuahin March/April 1975 atang khan thlakip chhuakin chhuah tan a ni a. October 1975 atang khan 'MEICHHER' tia a hming thlâkin vawiin thlengin chhuah a ni. 2025 khan kum 50-a tling a, Meichher Golden Jubilee 2025 lawmna chu June 26, 2025 khan Aizawl Vanapa Hall-ah taka neih a ni. Kum 1975 March & April thla chhuak atanga chhiarin January 2026 chu bu 815-na a ni.

Meichher Publisher atân hian tihchhuah tan tirh atangin Department hotu ber Director chu hman a ni thîn a; Meichher Editor mi 10 an awm tawh a; Meichher Editor hmasa ber chu R. Lalrâwna a ni a, tûna Meichher Editor ni mêk chu T.C. Lalremsiama a ni.

Meichher chanchinbua thu chhuahte zingah hian zirlaibua seng luh thuziak 22 a awm tawh a. Hengte hi School leh College a Mizo zirlai atan hman an lo ni tawh a ni.

Meichher Best Article of the year 2025-ah pakhatna Rev Zosangliana Colney Mission Veng Aizawl a ni a, a thu ziah chu Lal thar chibai i buk ang u tih a ni a, pahnihna Pu Joseph L.Ralte Chawnpui Veng a ni a, a thuziah chu Hlawhtling tura beidawnna tih a ni. 3-na Commissioner Lalkiamlova Tuikual South Aizawl a ni a, a thuziah chu Vawk leh Mizote tih a ni.

Meichher Best Contributor of the year-ah pakhatna Pu JH Biakmawia Electric Veng, Aizawl, pahnihna Pu Familia Laltansanga Fanai Zotlang Lunglei, pathumna Pu Mahmuaka Chhakchhuak Chanmari Lunglei te an ni.

Meichher Award semnaah hian Mizo Academy of Letters General Secretary Dr Zoramdinthara leh Mizo Writter Association President R. Lallianzuala te pawhin Award hmu tur an endik dan te an sawi a. Department Officer te, SCERT Director leh MBSE Controller te, thuziak mite leh Award dawngtute leh tawiawmtute an kalkhawm a ni.