ZALEN April 28, 2026 : 27.04.2026 khan Office Memorandum lem pakhat (Office Memorandum No. F-23012/36/2025-ESTT-CSD, ni 27 April 2026), General Administration Department-in ruah sur nasat avanga sawrkar chawlh a puanna ni awm tak chu Social Media platform hrang hrangah thehdarh niin mipuite tan buaina nasa tak a chawk chhuak a. He Office Memorandum lem siamtu hi man a ni tawh

He document-ah hian Irene Zohlimpuii Chongthu, Additional Secretary, GAD hming chuangin, Ch. Lalnunkima, Deputy Secretary, GAD-in digital signature-in a sign hnan angin a lang a ni. Hemi chungchangah hian Christina Lalmuanzuali, Under Secretary, General Administration Department, Aizawl District chuan Cyber Crime Police Station-ah dan anga hma la tura ngenin FIR a theh lut a. 

A ngenna angin CCPS Case No. 17/26 dt 27.04.2026 u/s 336(3)/353(1)(b) BNS 2023 chu ziah luh nghal niin, rang tak leh uluk taka chhui chhunzawm nghal a ni. Document lem siamtu hi rang takin darkar 24 liam hmain chhui chhuah a ni a. 28.4.2026 hian he sawrkar thuchhuah lem siama vawrh darhtu, Lalramhlua (kum 18), s/o Michael Lalramchhana, Upper Republic, Aizawl chu man nghal a ni. 

Sawrkar document siam danglam emaw siam chawp leh theh darh hi dan kalh tlat a ni a, hetiang thil lakah hian mipuite fimkhur hle turin kan inchah a. Lo inhnamhnawih te chungah dan anga na taka hma lak zel a ni dawn a ni. Mizoram Police chuan mipuite chu social media (Facebook, Instagram, Whatsapp etc) hmanga kan thil thawn darhah fimkhur lehzual turin leh thudik finfiah hmasa thin turin a ngen bawk a ni.