ZALEN June 24, 2026 : Chief Minister Lalduhoma chuan vawiin khan Conference Hall, CMO-ah press conference koin 'Ease of doing business' chungchang a sawi a. Right to Public Service Act chu mipui chanvo anih angin mipui tana awlsam zawka thil tih chu department lam chan anih angin mipui lamin an chanvo hriat a duh thu a sawi.

Chief Minister chuan, "Sawrkar department tih tur eng emaw zat a awm a, mipuite hnen atangin right to public service act hmangin complaint kan la dawng lo a. Kan thawk tha viau a tih theih rualin mipuite hian awareness kan tlakchham vang a ni ve thei a. Sawrkar kan dawra rei tak tak sawrkar atangin chhanna awm loin a awm thei a, hei hi mipui lamin kan hriat a ngai a. Mipuite service pek kawngah hunbi thliah anih avangin mipuite'n kan chanvo hria ila. Department lam pawhin mipuite'n an mamawh an thehluh chhan anih vat vat theihna turin tan lak a ngai," tiin media-te a hrilh a ni.

Lalduhoma chuan Mizoram Sawrkar chuan India Sawrkar laipui hmalakna zinga pakhat, Compliance Reduction and Deregulation Reforms Programme hnuaia dân leh hrai tûl lo leh rit lutukte tih tlêm a, kalphung tihawlsam te, inrintawnna thupuia hmang chunga rorelna kalpui te, leh sumdawnna lama hmasawnna leh investment, entrepreneurship leh economic growth tana environment tha siam tumna chu nasa takin a kalpui mêk a, Commerce, Industries, Geology & Mining Department chu Nodal Department niin, anni hian Mizoram sawrkar hnuaia department leh agency hrang hrangte he hmalaknain a huamte enzuiin an kaihruai a ni a.

Deregulation Phase-I (February–December 2025) hnuaia thawhrimnate avâng hian, Government of India hnuaia Department for Promotion of Industry and Internal Trade (DPIIT)-in ram pum huapa endikna a neihah Mizoram chu India ram State-te zingah 12-na a ni.

Chief Minister chuan Phase-II hnuaiah hi chuan State-a dân leh hrai hman mêkte uluk taka thlirletna leh tihhmasawnna lam a thupui ber a. He phase hnuaia ngaihpawimawh bîk (Priority Areas) 23 Mizoram tana thlan chhuah zinga hmalakna panga - Power Sector, Environment, Tourism, Health Care leh Education te chu India sawrkarin a pawm tawh a, Priority Areas hmabak dang te pawh ti hlawhtling tûrin chak taka kalpui a nih thu a sawi.

Right to Public Service Act in a huam sector hrang hrang 197-a zawhna awm thin leh hriat duh an neih, rei tak tak chhan lova thang thin te awlsam zawka hriat thuai a nih theihna tur portal chu July 2026 chhung hian siam zawh hman tum a nih thu he hunah hian sawi a ni.