Mizoram hi international ramri a awm kan nih avangin khawchhak lamah Myanmar riin khawthlang lamah Bangladesh kan ri a. Kan thenawm ram pahnihte hi ram changkang lem lo, India aia economy-ah pawh chhe zawk an nih avangin mi eng emaw zat chu Mizoramah an lo pemlut thin a. Tun hnai maia Zakhine raltlan thawnkir turte pawh an kir duh lo a, an rama an kir chuan ei leh bar kawngah harsatna an tawk dawn niin an insawi a, mahse tihluihna hmangin thawn kir an ni ta tho a ni.

Sumdawnna chungchangah pawh ram thenawm ai chuan kan changkang zawk a. Khawchhak lam atangin Zokhaw-thar kaltlangin bungrua engemaw zat a rawn lut a, khawthlang lamah pawh Tlabung kaltlangin bungraw thenkhat a rawn lut bawk a ni. Heng bungraw rawn lut te hi dan ang taka insumdawn tawnna kalpui a nih loh avangin a hlawkna tak tak hi Mizoram mipuite hian kan tel meuh lo a, tun aia hlawk zawka kan tangkai pui theih dan tur hi ngaihtuah ni se a lawmawm hle ang.

Khawchhak Myanmar atanga bungraw lolut zingah pawh kuhva chuan tun dinhmun maiah pawh min tibuai tan der chu a ni a. Mizoram hmarlam leh khawthlang lamah te kuhva huan siamin mi tam takin ei an zawng a, heng kuthnathawk te hian ni dang anga an tharchhuah te an hralh theih tak loh avangin an mangang a, market policy mumal kan neih loh kan tuar tan der a tih theih awm e.

Myanmar lam atanga kan lakluh tam tak zingah kuhva ringawt pawh hi kan hman tangkai thiam chuan Mizoram economy nasa taka chawikang thei tur a ni a. Nitin truck trip engemaw zat hi Zokhawthar kaltlangin a lo lut ruih ruih mai a, mahse Mizoram chu a kaltlangna kawng mai kan ni a. A hlawkna tel tak tak tu chu Myanmar sumdawng hausa leh central India lama mi hausa te an ni. Tun dinhmunah pawh Vairengte chhehvelah hetiang chhekkhawlna hmun tur kudam tam tak sak a ni a, heng zingah hian Mizote ta chu a awm mang lo niin an sawi a. Hetiang zela thil a kal chuan nakin lawkah kan ram hi vai mihausa ten min chhuh zo mai ang tih a hlauhawm hle a ni.

Sawrkar laipuiin khawchhak ram te nen insumdawntawnna turin chak takin hma a la mek a, Act East Policy vuahin hma a la mup mup mai a nih hi. Hei hi tihpuitlin a nih hun chuan Mizoram chu sumdawnna kalkawng pawimawh a ni dawn a, nitin truck za tel bungraw phurin an vei mup mup tawh ang. Kan sawrkar hian sumdawnna kawnga Mizoramin hlawkna a neih ve theihna atan hian tun atanga nasa taka a lo inbuatsaih hi a pawimawh a, mipui ten kan chhawr tangkai ve ngei theihnan ruahmanna felfai tak siam ngei teh se.