Aizawl June 18, 2024 : MNF chuan thuchhuah siamin Ni 14, June, 2024 khan Chief Secretary hnuaia hotu sang mi 31 zette an hna chanpual siksawi sak burh an ni a, hemi ni vek hian MCS, Senior and Junior Grade mi 28 leh Junior Administrative grade (JAG) mi 18 zet te transfer order chhuakin, anni rual hian MCS - Supertime Grade A & B leh Selection Grade mi 21 te Department awmna pawh siksawi nghal a ni bawk. Hetianga tumkhata in transfer nasat leh siksawi nasat hi a thlen vawi khatna niin, Sawrkar inluling, a hnuaia thawkte chunga lalna na taka lantir hrawn mek a ni tih lantirtuah an ngai a, pawi an ti.

"Kan ram hmasawnna tura an tha leh zung, ngaithuahna nasa taka sengtu, kan sawrkar neitu berte tia chhal ngamte rual chunga Pu Lalduhoma kaihhruai sawrkarin, tun hma a la thleng ngai lo, nasa taka tum khata kan ram mi zahawm rualte a thehthang kual dan hi a demawm tak zet a, hnathawk tak tak tura an zeizia zira insawnkual mai leh an senior dan azira an thutna tur hmun awm insiamrem satliah ni lovin, thil tithei an nihna nataka lantir paha, an duhsak zawngte vohna hun remchang langsar takin an lantirah kan ngai," MNF chuan an ti.

MNF thuchhuak chuan, "An hnathawh kawnga senior zawkte thutna hmun tura ngaiha a nilo zawk thuttir te leh vawi lehkhata Officer rual 100 dawn chet tir huk an ni hian kan ram tan thil tha a herchhuah pui a rinawm lova, duhdah taka chin phar an nihna hian kan Officer rual, zahawm takte leh an chhung leh khatte rilru nasa takin a hliamin a rinawm a. Sawrkar kal tawha thleng ngai lo thil thar lo thleng zel hi Kalphung thar chu a nih hmel a. Kalphung chhemi, 'Lal ngailo an lal a na, an lal a kha', tih nemnghettu zel a niah kan ngai," an ti a, Hetiang kalphung hi thleng nawn tawhlo se an duh tih an sawi.