Aizawl April 15, 2024 : MPCC President Lal Thanzara chuan, "Kan hma lawkah Lok Sabha inthlanpui 2024 kan nei dawn a. He inthlanpui hi kan ram leh kan mipuite tan mai ni lovin India ram pum leh mipuite tan a pawimawh takzet a ni. India ramah Democracy chawinunin a awm dawn nge mipuite zalenna rahbeha awmin mimal thuneihna (Autocracy) hnuaiah kan lut dawn tih a hril dawn a ni," a ti.

Patea chuan, "Narendra Modi-a kaihhruai NDA sawrkar hian mipuite zalenna chanvo (right to freedom) nasa taka rapbetin Central Sawrkar institution pawimawh CBI, Enforcement Directorate, Income Tax Department leh a dang tam tak chu hmang sualin, mipui vantlang leh an lam tang lo political party leh hotute harsatna siamsakna (harassment and intimidation) hmanrua ah a hmang nasa em em tawh a. Mipuite zalenna rahbehna hmanrua a heng sawrkar institution hmansualna hi Pu Narendra Modi-a kaihhruai NDA sawrkar hnuaiah a zual zawngin chak takin a kal zel a ni."

"Pu Narendra Modi-a kaihhruai NDA sawrkarin tun kum sawm kalta chhunga kan sakhaw zalenna nasa taka min rahbeh sak leh a zual zawnga a kal zel dan a taka hmutute chu kan kohhran hrang hrang leh Mission field a thawktute hi an ni," a ti.

Congress President chuan, "Mipuite zalenna chanvo (right to freedom) kan neih te hi BJP kaihhruai NDA sawrkar hnuaiah tam tak lak bosak kan ni tawh a, lak bo mek zel a ni. India rama dan hremi (Lawyer) lar berte zinga mi Pu Prashant Bhushant chuan 'kum 2024 Lok Sabha election-ah NDA sawrkar thlan tlin leh a nih chuan Indian Constitution hnuaia Fundamental Rights kan neihte hi tihbovin a awm ang,' a ti hial a ni. Central Finance Minister ni mek Nirmala Sitharaman pasal Parakala Prabhakar, Accademician hmingthang pawhin 'Prime Minister Modi-a hi thlan tlin leh a nih chuan Indian Constitution tihdanglam a ni ang a, Lok Sabha election hi kan neih leh theih pawh a rinawm loh,' a ti hial a ni," a ti.

Lal Thanzara chuan, "Kan ram, kan hnam leh kan sakhaw him nan Centrala BJP kaihhruai NDA sawrkar hi paihthlak a ngai a ni. Chumi atan chuan Mizoram mipui ten tih tur leh tih theih kan nei: Central-a BJP thawhpuia, an tha tichaktu tur MP thlang lova, BJP tha chhata Kan ram, kan hnam leh kan sakhua humhim tura nghet leh huai taka ding tur Congress MP Candidate thlan tlin hi a ni."

"Congress MP Candidate Lalbiakzama, MPS Rtd, Mizoram sawrkara Home Secretary pawh lo ni tawh, kum 32 sawrkar hna a thawh chhung pawha hmingtha leh chhuanawm, thenawm State-te nena ramri buai, hel pawlte nena sawrkar aiawha inbiakna, raltlante nena inbiakna, national security chungchanga Central Sawrkar (Home Ministry) leh State sawrkar inkara thu inchuh leh thil pawimawh leh harsa khawih tur pawha Congress leh MNF sawrkar ten rinrawl bera an neih, Mizopa dik tak, fel, hmangchang hria leh huaisen kan nei hi kan lawm a. Amah tluk tur MP candidate dangte zingah an awmin kan hre lo," a ti bawk.