ZALEN May 10, 2026 : April, 2025 atanga March, 2026 inkar khan Mizoram sawrkarin naupang leh tleirawlte harsatna ching fel tura a ruat, Child Welfare Committee (CWC) chuan case 1,321 leh Juvenile Justice Board (JJB)-in case 261 an ching fel.

ZALEN-in Mizoram State Child Protection Society thawktute hnen atanga thu dawn danin nikum chhung khan naupang chungchang ngaihtuah tura ruat, CWC hian kum hmasaa case ngaihtuah hman loh (pending) 78 neiin dawn thar 1,299 an nei a. Heng zinga case 1,321 chu ching felin case 56 chu kum thar lam ngaihtuah chhunzawm turin an dah a ni.

CWC-in case an dawn thar zingah hian retheihna avanga naupang enkawl thei lo chu tam berin case 444 a tling a, case an dawn zawng zawng atanga chhutin 34% a tling a. 

Nu leh pa fel lo/enkawl mumal thei lo (incapacitated parents) chu a tam ber dawttu niin 253 ngaihtuah a ni a, mipat hmeichhiatna rawngkai (sexual abuse) chu pathumna niin case 180 dawn a ni bawk.

CWC case dawn thar zinga 671 chu hmeichhia niin mipa 628 an awm bawk a. Case chin fel zinga tam zual chu mi dang enkawl tura kaltir (sponsorship) 609, children home a dah 351, councelling kaltir 221, case tihtawp 46 leh chhungte hnena hawtir leh 47 te an ni.

Nikum (April 2025-March 2026) chhung vek khan tleirawl/rawltharte harsatna ngaihtuah tura din, JJB chuan case 261 an ching fel bawk a. Kum hmasaa case pending 86 neiin dawn thar 273 an nei bawk a, case 98 chu kum thara ngaihtuah chhunzawm tura dah a ni a, case dawn thar zinga 22 hi hmeichhia niin mipa 251 an awm bawk. 

JJB case dawn thar zingah hian rukruk case tam berin case an dawn thar 273 zinga 145 lai a ni a, case an dawn thar atanga chhutin 53.11% lai a tling a ni.

Case dawn thar zingah hian POCSO Act bawhchhiatna 45, ND&PS Act 25, mi tihnat 10, IPC bawhchhiatna 15, mi ina luh ruk/ in rawk paruk leh mi dang beih (assault) case panga an ni.

Case chin fel zinga tam zualte chu in lama hawtir leh 125, nungchang that vanga chhuah 57, special home a dah 32, pawisa chawitir 14 leh pawikhawihna nei loa hriat 12 te an ni.

# April, 2025 leh March, 2026 inkar chhung khan Child Care Institution (home) hrang hrangah naupang 701 dah thar an ni a. Hengte hi Children’s Home-ah 400, Observation Home-ah 240, special home-ah 23, hmun him zawka dah 17 leh adoption agency (naupang lak) 21 te an ni a. Tun dinhmunah Mizoram chhungah Child Care Institution (home) 67 a awm mek.

# Child Care Institution hi nikumah 51 awmin kuminah 67 a awm mek a, nikum aiin 16-in a tam.

# Aizawl district bikah kum kalta chhung khan Aizawl district CWC chuan case dawn thar 345 leh kum hmasa lama pending 11 neiin heng zinga 343 chu chin fel a ni a, kum thar lama ngaihtuah turin 13 dah a ni.

# CWC Aizawl district case dawn thar zinga 179 hi hmeichhia niin mipa 166 an awm bawk a. Case dawn thar zinga a tam ber hi mipat hmeichhiatna lam hawi (sexual abuse) niin case 84 awn a ni.

# Nikum chhung vek khan Aizawl district JJB chuan case dawn thar 93 neiin kum hmasa lama pending 44 an nei bawk a. Heng zinga 96 chu chingfelin kum thar lama ngaihtuah turin case 41 an dah bawk a ni.

# Aizawl district JJB case dawn thar zinga 6 hi hmeichhia niin mipa 87 an awm bawk a. Case dawn thar zingah hian rukruk case chu tam berin 53 a awm a, POCSO Act chuan dawtin case 10 ngaihtuah a ni.

# Nikum chhung hian Aizawl district bikah Child Care Institution (home) a dah naupang 291 an awm a, heng zinga 94 hi hmeichhia niin mipa 197 an awm bawk.

# CWC case ngaihtuah zingah hmeichhia an tam zawk a, JJB case-ah erawh a let engemaw zatin mipa an tam thung. CWC case dawn tharah hian hmeichhia leh mipa an inzat thuak laiin JJB ah erawh case dawn thar zinga 91.94% hi mipa an ni a, hmeichhia hi 8.05% chauh an ni.