ZALEN December 13, 2024 : Vawiin khan Mizo Hnam Run chhung inkhawmah MNF Senior Vice President, Dr. R. Lalthangliana chuan Pathian leh mipui zarah MNF-a sawrkar leh hunah ration buhfai man a let thawka to leh, oil man tih to-te chu mipui phurrit chhawk zangkhai thei tura a man ennawn leh tur a nih thu sawiin, health care pawh changtlung taka kalpui leh an tum thu a sawi.

Dr. Thangtea chuan, "Chhiahhhiah tipung ve lo tura insawi leh mipui phurrit siam ve lo tura insawi ZPM sawrkar tharin ration buhfai man a let thawka tipungin, oil man uchuak takin a tipung a, Pathian leh mipui zarah MNF a sawrkar leh hunah mipui phurrit chhawk zangkhai thei turin kan ennawn leh ang," a ti.

Health Minister hlui chuan, "MNF sawrkar khan sawrkar tirh atanga kum khat pawh tlinglo-ah Health care changtlung tak kalpui turin hma kan la nghal a. Covid hrileng karah pawh Universal Health care kalpui turin Health Minister ka nih ang khan central finance ministry-ah nasa takin ka nawr a, screening committee kaltlangin ADB atangin cheng vbc 1000 min approved sak a, MLA election hnaih avangin kan bawhzui hman ta lo a. ZPM sawrkar tharin a ngaihna a hriat loh vang nge, a zir chian loh vang, a hlawhchhampui ta mai hi pawi ka ti a, sawrkar tan thil zahthlak tawp khawk a ni. Kan sawrkar leh chuan changtlung leh tha zawkin kan kalpui ang," a ti.

Ramri hung tum chungchang sawiin MNF Senior Vice President chuan, "Sawrkar laipuiin Myanmar ramri 1643 km-a thui Border Road Organization (BRO) in kum 10 chhunga hung fel tura hma a rawn la chho thar leh hi MNF chuan kan dem tak zet a ni. Tuna kan rorel lai ZPM sorkar hian engtin nge a tih dawn? Kan unaute nen kan inkar Central-in hung luih a tum hi kan dem hle a. Tuna kan sawrkar hrawn mek ZPM sawrkar hian Central BJP sawrkar hi a dodal zel ngam dawn em? Nge a mawiah a do ve chauh ? A do ngam tak tak anih chuan a rang lama hma la ngei turin kan phut tlat a ni," a ti a.

Dr. R. Lalthangliana chuan ZPM sawrkar tharah hmasawnna hnathawh mumal sawi tur an neih loh avanga inhlawhfa leh sumdawng thlengin pawisa vang an tih thu te, stamp duty thlenga a man an tihpun thu te, kan economy a tlakchhiatzia thu te a sawi a. Central sawrkarin state dang project lian an approved mawl mawlh laiin Mizoram tan approved sawi tur a awm mang lo a, sanction phei chu sawi tur awm lo tluk anih thu a sawi bawk.