Aizawl: Nizan hmasa khan Panchayat Bhawan, Bairabi North-ah Zophai ramri buaina changchanga ramria duty sawrkara thunei-tute leh All NGO, Bairabi-te an thu-khawm a, tunhnaia ramri a buaina thleng chungchang an sawiho

Inkhawm kaihruaitu Kolasib DC Dr.H.Lalthlangliana chuan ramri chungchangah sawrkar lam thuneitu te thu ngaihchan thiam leh an thuzawm a pawimawh hmasak thu a sawi a, ramria hmalakna chu ngaihtuahna fim tak nen ruahmanna kalpui a tul thu a sawi. Hmalakna kalpui danah hian nakin huna ramri hauhna kawnga hmalakna ngelnghet zawk a thlen theihna turin ngaihtuahna sen tel a tul thu a sawi a, Bairabi NGO-te thahnemngaihna leh inpeknaah lawmthu a sawi bawk.

Lalhuliana Fanai, IPS, DIG pawhin engpawh hmachhawn thei turin an inpeih reng thu a sawi a, nunna thap ngai a nih pawhin Mizo thalaite inhuam ang bawkin Mizoram police-te chu an inhuam reng thu a sawi a, an hna a nih angin hemi kawngah hian Police duty-te chu ring ngam turin Bairabi NGO aiawha kalte a chah. Awmze nei lova hmalakna chuan chhiatna duhawm loh zawk a thlen phah theih avangin, awmze neia rua-hmanna a awm theih nan ngun taka ngaihtuahna sen a ngaih thu a sawi bawk. Lalthafamkima Jongte, AIG pawhin sawrkar ruahmanna a hlawhtlin theih nan thawktute chungah rinna nghat ngam turin kalkhawmte a chah bawk a ni.

R.Lalfamkima, VCP, Bairabi North chuan Zophaia ramri ven nana hmalaknate tarlangin, mahni ramri chin ve ve ah Police duty awm tir vat chu ramri venhimna kawnga mamawh hmasa a nih thu a sawi a. Bairabi-a NGO hrang hrang aiawhte chuan an ngaihdan sawiin, ramri hnaiha leilet te chu hnamdang enkawlna hnuaia awm tawh lovin changtlung zawka chei that thuai a tul thu leh ramri-a sawrkar hmalakna chu an thlithlai reng tur thu an tarlang ve bawk.

Sawrkar leh Jt. VC, Bairabi tangkawp hmalaknain Ramri lui thlenga lirthei lut thei turin kawng laih tlang a ni a, a tul laiah te hume pipe phum a ni.