Mizoram sawrkar chuan State Health Care Scheme kalpui a nih dan a tidanglama, damlo enkawlna rate a siam chu a hniam deuh tiin private hospital-te chuan an pawm thei lo a. A zawm thei lote chu sawrkar chuan empanelment an nihna chu a hlihsak a, tunah sawrkar leh mi mal damdawi inte chu an inchal tauh mek a, a tam zawkin sawrkar rate thar chu an la pawm thei lo a, mipui lamin harsatna an tawk tan tawh a ni.

Empanelment loh zingah hian mi mal damdawi in liante chu a tam zawk an ni niin an insawi a, hmunhma leh hmanrua nei tha zawk an nih avangin mipui pawhin an bawh a, harsatna namenlo mipui lam hian an tawk chho dawn tih a lang reng a ni. Private hospital ho hi hrut rual chi niin a lang tawh loa, sawrkarin tuna category siamsak a tum danah pawh category khatah a tawpa inkhairual tumna tho a awm nia an ngaih tlatna te hi chhui chiana thu dik tak phawrh a hun ta khawp mai. A nih loh chuan rate chungchangah hian buaina a awm reng dawnin a lang a, sawrkar hi ‘fair’ leh huai taka a chet ngam a ngai dawn a ni.

Sumdawng an nihna chen a awm vangin damdawi in pawh a inthlau tawh angreng a, bungrua leh thiamnaah pawh an intlansiak a tihtheih tawh a ni. A tam zawkina an duh an damlo enkawlna rate sawrkarin a tlin lohna rate damloin chawi ve mai se an tih pawh hi phai damdawiin leh sawrkar insiamremna ang a ni a, a damdawiin a zirin a awmin a awm lo thei tiin ngaihdan a siam theih tawh a ni.

Vaibelchhe tel batsak an nih chungchang pawh hi enchian a ngai khawp mai, insurance company-te kawk leh tura hnuh luh an nih chuan thil dik lo hul hual a awm tihna a ni a. Hetiang tawnhriat an neih avanga tuna an tim phah a nih phei chuan buaina lian zawk chinfel theih loh a awm belh zel ang.

Sawrkar hi private ring miah loa kal a tum a nih chuan a damdawi inte hi thuam tha sela, hmalakna tur tam tak a awm mek a sawi sen a ni lo. State dangah chuan Public Private Partnership (PPP mode) angte pawha kalpui a ni tawh a, hetiangte hi kan mamawh a ni tawh mahna.

Eng pawh nise a tuartu chu mipui an nih avangin he harsatna hi sut kian a nih theih nan ruahmanna (planning) tha tak nen indawr leh thei sela, hmathlir thui zawk leh zau zawk neiin rilru an put dun erawh a ngai ang.