ZALEN November 4, 2023 : Mizoram Pradesh Congress Committee (MPCC) President Lalsawta chuan naktip maia Mizoram MLA inthlanpui lo awm turah Congress chuan sawrkarna chan ngei an inbeisei tih a sawi.

Aizawl Press Club-a chanchinbu mite a kawmnaah MPCC president chuan, “BJP hian hmarchhakah regional party-te a thawhpui vek a. Tunah hian MNF hi chak tura a ngaih loh avangin ZPM nena thawhho an tum tih hi AIR ni 28.10.2023 tlai lam thu tharah khan a chiang vek a ni,” a ti.

Congress party chu insiam tha tharin kumin inthlanah sawrkarna an siam a nih chuan thlei bik nei lo, sawrkar dik, eiruk awm lohna, hnathawk chak leh mipui tana chhawrnahawm te, hriselna kawngah ‘healthcare’ tha zawk leh ‘Health Insurance cheng nuai 15 thleng’ siam an tum tih te, sawrkar hnathawkte tan old pension scheme siam thar leh te, CSS Employees Coordination Committee te harsatna chin felsak te, lo neitu, kuthnathawk, thalai leh kawng hrang hranga hna thawk mekte tan eizawnna ngelnghet an neih theih nan ‘Tang puihna’ buatsaihte an tum niin a sawi a. Subsidy chungchang sawiin chhungkaw harsa tam tak tan ‘subsidized gas’ bur khat Rs 750-a lei theiha siam te, thla tin electric bill unit 100 chauh hmang chinte a thlawna pek leh tar chawmna thla tin Rs. 2,000-a tihpun an tum tih a sawi bawk.