ZALEN December 15, 2025: ZPM chuan vawiin khan party Office-ah kum 2025-a Party chhung inkhawm hnuhnung ber an hmang a, Party President Lalliansawta chuan LADC-ah sawrkar ngelnghet tak din a nih theih nan duhsakna a hlan a, LADC-a Lairam Legislature Party leh ZPM Legislature Party-a leader T. Zakunga chuan sawrkar ngelnghet din a nih theih beiseiin MNF nen inremna an siam a ti.

Lalliansawta chuan, “Politics-ah thian hlun a awm theih lo va, hmelma hlun a awm thei lo an tih hi a dik khawp mai a, ram siam tha tak tak tur chuan inremna siam a ngai fo thin. LADC-ah pawh party ni lovin Lairam kan ngaihtuah zawk a ngai a, LADC-ah sawrkar ngelnghet tak din turin duhsakna ka hlan,” a ti.

LADC-ah hian party mala sawrkarna siam thei an awm loh avangin ZPM leh MNF-ten LADC-ah Lairam Legislature Party (LLP) an din a, T. Zakunga, ZPM chu Chief Executive Member tura ruat niin, Deputy CEM tur chu MNF lamin an ruat ve thung ang. Party pahnihte hian LADC-ah sawrkarna ngelnghet tak siam turin inremna an siam a ni. LADC-ah hian ZPM Party atangin mi paruk - T. Zakunga, L.R. Dingliana Chinzah, Lallura Chinzah, T. Lalchhuanvawra, Dr. K. Lalchhuanpuia leh K. Lalramzauva te thlan tlin an ni. 

LADC-a Lairam Legislature Party leh ZPM Legislature Party-a leader ni bawk T. Zakunga chuan, “Mizoram kaihruai turin ZPM sawrkar chak tak Pathianin min pe a, chutih laiin LADC-ah ZPM-in MDC member 6 chauh kan nei hi keini pawhin tlem kan tih rualin; Pathian remruatah kan ngai a ni. Inthlan zawhah sawrkar din tumin Congress party nen ZPM PAC hmalaknain kan inbe zui a, uluk taka kan hotuten an ngaihtuah hnuah MNF Legislature party nen sawrkar ngelnghet zawk din theih a nih beiseiin inremna kan siam ta a ni."

"LADC-ah sawrkar ngelnghet a awm theih loh avangin hmasawnna kawngah pawh kan thuanawp phah hle niin kan hria a; chuvangin, lungrual takin kan hotute kaihhruaina hnuaiah sawrkar thar din turin Governor hnenah vawiin tlai hian sawrkarna kan siam theih thu kan thlen nghal dawn a ni,“ a ti.