Aizawl April 10, 2023 : Lunglei District Congress Commitee President K L. Chhawnzauva chuan, Tunlai hian party thenkhat ten thangthar te hnenah Mizoram Political Party lo awm tawh ten Zoram tan leh Lunglei tan engmah thawk lo angin zirtirna an thehdarh niin a sawi a, thalo a tih thu leh thangthar te diklo taka hruai kawi tumna a ni, a ti. 

Lunglei-a Congress Party Office-a chhung inkhawm neihah sawiin LDCC President chuan, "Congress Party chauh nilo MNF leh P.C Party te pawhin Mizoram tan mai nilo Lunglei tan nasa taka hna an lo thawh tawh vang zawka vawiin thlenga hmasawnna la hmu kan ni," tiin, "Congress sawrkar-in Mizoram ah remna leh muanna a awm theih nana a thawh te, hun harsa leh thim ber atanga min chhanchhuah dan te leh hmasawnna ruhrel lian tak tak a lo thawh tawh te hi kan thalaite hian an hriat a tul a ni," a ti. 

K.L. Chhawnzauva chuan, "Congress Ministry-in kan ram tana a lo thawh tawh te hi a chhuanawm hle a, hmasawnna ruhrel lian kalpuiin, Lengpui airport, Medical College leh University hial kan lo nei ta te hi Congress sawrkar hna  thawh te a ni. Lunglei lamah nise, Mizoram Politechnic, Engeneering college, Science centre leh Hall lian indoor stadium kan neih te leh department office building changtlung tak tak te, ruahmanna lian tham tak tak, Lunglei by-pass road leh tui intur hnianghnar kan neih theihna tur, Lunglei greater water supply scheme te bakah Congress sawrkar hian ruahmanna tam tak hmachhawp a la nei mek a ni," a ti. 

Sawi zawmin LDCC President chuan, "Hetihlaia tute emaw in Party dang laka thalaite hel tir tum niawm taka sawrkar-na siam tawh ten engmah hnathawh an neilo ti zawnga an tlangau thin leh scial media hmanga an thehdarh thin chu thu belhchian dawllo a ni," a ti a. Hei hi thalaite pawhin hria se a duhthu leh Congress sawrkar-in ram tan leh Lunglei tan eng te nge a lo thawh tawh tih te zirchiang  se a duhthu a sawi.