Aizawl September 16, 2022 : Mizoram University Department of Political Science buatsaihin vawiin hian Dean’s Multipurpose Hall, School of Social Sciences, MZU-ah 'Political Talk' buatsaih a ni a. He huna Speaker MPCC President Lalsawta chuan, kan chhungril nun a chhiat miau chuan hmasawn eng ang mah ila awmzia a awm chuang lo. Mihring rilru leh nunphung siamthat hi ram hruaituten kan tum ngei ngei tur a ni, a ti.

Lalsawta chuan, "Chhura Chengkek lo tur, Nahaia a nih loh vanga lo thei lo emaw inti tlat ang deuh khan ram dangin an tih theih hi Chhura emaw intiin ti thei ve lovah kan in ngai tlat thin. He kan rilru puthmang hi siamthat a hun tawh takzet a ni. Chhura emaw inti tlat thin Mizoram mipuite hian Sawrkar Tha hi kan siam ve thei reng a ni tih kan hriat a ngai.  Hnam tinin Ram leh Mipui kan nei vek a, heng thil pahnih enkawl tha apiang hian ram ralmuang, him leh hausa an siam thin. Environment humhalh leh mihring rilru leh nunphung a tha zawnga hruaite hi ram leh hnam hmasawn nan a pawimawh em em bawk. Hmasawn kan duh avang hian kan environment hi a chhe kher tur a ni lo, environment humhalh chungin hmasawnna kan kalpui tur a ni. Chutiang bawkin kan chhungril nun a chhiat miau chuan hma sawn eng ang mah ila awmzia a awm chuang lo. Chuvangin, mihring rilru leh nunphung siamthat hi ram hruaituten kan tum ngei ngei tur a ni," a ti.

"Hmasawn tur chuan sawrkar tha (good governance), dan rorelna (rule of law) a pawimawh em em a. Rom sawrkar, Nero a rorel lai chuan Nero-a rilru ang ang kha dan a ni ringawt a, a kutzungpui tih pir leh tih pir loh a zirin Gladiator te an thi a, an nung mai thin, chu chu 'Rule of Thumb' an ti. Bihar-ah Laloo-a rorelna hnuaiah dan rorelna (rule of law) a awm lo a, Nitish Kumar-a hnuaiah chuan dan ang taka rorelna awmin, nasa takin hma an sawn phah ta reng a ni. Tin, sawrkarin engkim tih a tum hian a buaithlak a, sumdawng emaw a intih phei chuan buaithlak tak a ni thin. Hmasawn kan duh chuan mithiam leh nachang hria, a thiam leh a ti theite kutah thil tam tak kan dah ngam tur a ni," a ti bawk.

Lalsawta chuan, "Ram hmasawnna atan chuan Management, inenkawlna tha hi a pawimawh ber. Ram hmasawn leh hmasawn lo pawh hi Management that leh that loh vang mai mai a ni. Mipui hi chhiah petu kan ni a, sorkar chu kan chhiah pek tlingkhawm hmanga hmasawnna hna thawktu a ni thung. Mipuiten kan chhiah pek tlingkhawm hmanga sorkar inenkawl dan hi ngun taka kan vil a pawimawh a ni," a ti. 

Sorkar tha siampuiah zirlaite sawmin, "Mizoram tihmasawn tur leh Sawrkar Tha siam tur hian engmahin min dal lo. Kan ram hi Mizoram a nih angin Mizote chauh lo chuan kan chhanchhuak thei hek lo. Mipui hi kan tanrual a, duhamna laka kan fihlim phawt chuan kan ram hi kan siamtha thei. Min hmangaih vang ni miah lo, anmahni inhmangaih vang mai mai a kan vote lei tumtute hi kan hnawl ngam a ngai a ni. Chutiang taka ram siamthat tumna nena mitinin chet kan lak ngam phawt chuan Mizoram hian hma a sawn em em ang, Sorkar Tha hi kan siam em em ang," a ti bawk.