Aizawl March 22, 2023 ; Lunglei Municipal Council inthlan tura inbuatsaihnaah Lunglei khawpui chhung Zotlang leh Serkawn kawtthler panga-ah vawiin khan Congress Party buatsaih vantlang inkhawm neih a ni a, he huna thusawitu Lasawta chuan ZPM leh MNF dinhmun a hmuh dan te, NREGS leh Old pension scheme chungchang te a sawi.

He huna thu sawitu Lalsawta chuan, "ZPM-ah chuan mipui thlan chhuahte veng turin Val Upa Council an din a. Mipuiin an thlan chhuah tawhte ven ngaiin an hre tlat a ni. Hei hi Democracy kalphung a ni lo. Ven ngai tur hruaitu hi mipuiin kan thlang thin tihna a ni dawn em ni? ZPM atanga thlanchhuahte chu ven ngai vek an ni dawn tihna em ni? Kan aiawh kan thlan chhuahteah hian mawhphurhna sang tak a awm a, chutiang tur chuan ven ngai lo mi dik, mi tha kan thlang mai tur a ni zawk. Sawrkar tha lo hnuaiah mipuite retheihna a zual thin a, tunah hian sawrkar tha lo kan hrawn mek a ni. Mipuite retheihna ti ziaawm turin Congress Party chuan sawrkar tha din kan tum a ni," a ti.

Sorkar tha chungchang sawiin Sawta chuan, "Sawrkar thaah chuan mipuite hi kan ngaipawimawh hmasa ber tur a ni. Hmanni lawkah Hnam Run-ah MNF hotupa Pu Zoramthanga chuan, 'Inthlan leh hunah chuan tun hmaa kan retheih ang kha a ni tawh dawn lova, sum hman tur kan nei tawh dawn,' tiin sum hmangin a party mipuite a thlamuan a ni. Kha sum kha mipui thawhkhawm sa, Kamrula hmanga an lo chhek khawl a ni. Chuvangin, tun tumah pawh hian sum hman an rawn tum ang; tute mahin lo la duh suh u. Lei theih i ni lo tih lo lantir zawk ang che," a ti bawk.

Lalsawta chuan NREGS chungchang sawiin, "Lunglei khawpui hi khawpui pawimawh tak ni mah se, rualawhna tam tak a la awm. Hemi tur hian LMC-ah sorkarna kan chan chuan hma kan la ang. Tin, Lungleiin Municipal Council a neih dawn takah chuan mi harsa zawk te innghahna NREGS a bo dawn. Kum 2023 inthlanpuiah Congress Party-in sawrkarna kan siam chuan Municipal area chhunga cheng mi harsate inhlawhna tur Urban Employment Guarantee Scheme kan buatsaih dawn. Ni 100 inhlawhna bo mai tur ui taka thlir mektu Lunglei mipuiten LMC-a kan candidate-te lo vote tlingin sawrkarna lo siam tir ula, kumin inthlanpuiah sawrkarna kan siam veleh in tan Ni 100 inhlawhna thlaktu tur Urban Employment Guarantee Scheme kan rawn buatsaih dawn a ni. In tan Congress party hi a ding dawn, NREGS-in mamawh dawn lo," a ti. 

Old Pension Scheme chungchang sawiin, "Congress Party kan sawrkar a nih chuan sawrkar hnathawkte an chhungte te tana hamthatna Old Pension Scheme kan kalpui dawn bawk. Hei hi sawrkar hnathawk mekte leh thawk leh zel turte tan a tha zawk. Kum tam tak kan tlin tawh a, kan la tlin zel ang. Mizoram hi pension fund vangin a buai ngai lo, Corruption hi a ni kan buaina tak tak zawk chu. Kum 30 kalta te ngaihtuah chuan nasa takin hma kan sawn tawh, mahse, kan beisei ram kan la thleng lo. He ram hian kan beisei ang dinhmun a thlen hma loh chuan Congress party chuan Mizoram tan theihtawp a chhuah zel dawn a ni," a ti.