Aizawl February 28, 2023: Vawiin khan Golden Hall, Congress Bhawan-ah kum 2023 MLA General Election neih tura Congress Party Manifesto No.2 ‘Sawrkar Tha (Good Governance)' tih chu MPCC President Lalsawta’n a tlangzarh a, an manifesto chu sawrkar hunah chauh ni lo, tun atang hian anmahniah an lantir a tul tih a sawi.
    
MPCC President chuan Manifesto chungchang sawiin, "Kan sawrkar hunah kan ti ang tih lam a ni lo, kan sawrkar hma hian keimahni ah kan lantir tur a ni a, kan vei tur a ni a, a takin kan nunpui tur a ni. Sawrkar Tha siam hi kan tum tak tak a, hlenchhuah ngei pawh kan tum a ni, tih Mizoram mipuiin min hriatpui se ka duh a ni, a ti. 
    
Sawrkar tha (Good Governance)-ah chuan thil tha tih a awlsam a, thil sual tih a harsa thin. Sawrkar tha loah chuan hausak a zahthlak a, sawrkar thaah chuan retheih a zahthlak. Mi retheite hausakna tur sawrkar tha siam hi kan tum a ni a, chu chu kan kal dan tur a ni. Mipui retheih laia sawrkar hotute hausak hi sawrkar tha lo zia a ni, a ti.   
    
Lalsawta chuan, Chief Minister, Minister leh MLA te hi langsar leh lian takin angin lang mah se, sawrkar hnathawkten a nihna ang taka an thawh avang zawkin ram hmel a danglam thin tih sawiin, "Sawrkar hnathawkte hi sawrkar kutke ber an ni a. Sawrkar hnathawk pension tawhte pension mai tur leh pension mek te tana tha zawk Old Pension Scheme kalpui hi kan tlin a, kan thei bawk. Kum tam tak, Mizorama sawrkar hnathawk awm hmasa ber atang vawiin thleng hian Old Pension Scheme hmanga pension vek an ni a, kan tlin reng a ni. Tunah hian new pension atan kumtin nuai 4500 chuang kan hmang reng a. Old pension pawisa pek ngai bawk, new pension atana pawisa sen ngai bawk hi Mizoram tan chuan a hautak lutuk a ni. Tin, Congress Party kan sorkar a nih chuan sorkar hnathawkte hlawh bakah hamthatna hrang hrang - DA, DR, CP Fund leh Penssion Benefits-te hi a hun takah pek an ni dawn a ni," a ti.  
    
Kan ram dinhmun kan hria. Rorelna mumal loah avanga mi sual tlemte inthurualin mi tha ngawi renga awm te rahbehin an awm a. Mizoram hi misual leh pamhamte kutah kan dah dawn lo. Bial tinah Mizoram tana mi tha kan dintir dawn. Sawrkar tha siam turin inthlan hma thla 10 emaw chauh awm tawhah sum hmanga thlemna leh tawktarh dang te do tur leh hnawl turin Mizoram mipui ka ngen a ni, a ti bawk. 

Manifesto No. 2 a Sorkar Tha siam dan tur tarlan tlangpuite chu : Corruption awm lohna sorkar, Dan rorelna (Rule of law), lang tlang sorkar (transparent government), Thuneihna sem zai ngam sawrkar (decentralisation), Smart government leh sawrkar viak tha leh mipui rin ngam tihte a ni.