Aizawl August 27, 2024 : Vawiin khan Aam Aadmi Party hruaitute chuan Hunthar Primary school leh Middle school a lei tla hniam chu a hmunah an tlawh a, AAP hruaitute chuan zirlaite zirna hmun leh zirlaite an himna sawrkarin a ngaipawimawh lova, khawtlang hruaitu hrang hrangten lungawilohna an lantir a, an fate himna ngaituaha zirlaite leh zirtirtute school kal tur an dang hi sawrkar mualphona a ni an ti.

AAP chuan, "Sawrkarin zirlaite himna ngaihtuah vat tur leh zirlaiten an zirna sikul a thlamuang taka an kal theihnan hmala vat turin kan ngen a ni. Beisei sang tak nen a kan thlir sawrkar-ah pawh zirna ngaihsak a ni lo tih kan hriat hian kan rilru a na hle a, an insawi ang ngei a sawrkarna kalpui turin sawrkar hi kan duh bawk a ni," an ti.

AAP Mizoram President Andrew Lalremkima chuan, "State dang sawrkar ten zirna leh zirlaite an ngaihsak hle laiin, kan state-ah chuan mipuiin sawrkar kan nawr kal a ngai fo hi, a lungchhiat thlak kan tiin, sawrkarin zirna a ngaihpawimawh hi a hun ve hle tawh a ni" a ti a, “Ram hmasawn tur chuan zirna in leh zirna hi kan ngaihpawimawh hmasak ber turte zing a mi a ni," a ti bawk.