DOWNLOAD OUR APP

Read latest news on your phone
app-store

Sawrkarin a dinna tichiang se

Jul 31, 2022

Kuthnathawktute grape kan chintir laia a tharchhuah kan man sak leh hi chu a kalphung lo hle mai. Chuvangin grape chungchangah hian sawrkar hi thle mai mai lovin a dinna chiang takin puangchhuak thuai teh se. 

Mizoram kuthnathawktu, a bikin khawchhak Hnahlan leh Champhai tlangdunga kuthnathawk chhungkaw thahnem tak chuan kum engemaw zat atang khan grape chingin an hlawhtlin pui hle a. Chhungkaw tam takin in leh lo te dinin kum tin sum lakluhna hnar pawimawh takah an hmang thei a. Chhungkua leh khawtlang pawhin hma a sawn phah hle niin an sawi.

Grape hi MNF sawrkar hun hmasa lama kalpui tan kha a niin sawrkar pawhin theihtawpin MIP sum hmangin Hnahlan leh Champhai a grape chingtute hi a pui a. A hralhna tur (market) a awm that bawk avangin kuthnathawktute an hlimin sawrkar chungah pawh an lawm hle a ni. Grape hi tun aia uar lehzuala kan chin chuan kan ram economy chawikang thei tur zinga mi a ni.

Kum 2018 kum tawp lama MNF kaihhruai sawrkar a lo din khan kuthnathawktute chuan sawrkarah beiseina sang tak neiin bul an tan chho leh a. Mizoramah zu khapna hman anih leh tak avangin grape pawh a market pawh a tha chho leh ta a ni. Hetia phur taka kuthnathawktute an awm laiin tunhnaiah engmah sawilawk pawh awm lovin grape zawrhna hmunpui Millennenium centre chu Excise & Narcotics Department chuang thawng thutin nuai tam tak man hu grape tui man sak an ni a. Hei hian grape chingtute pawh a ti hnualin politics ah pawh inhnialna nasa tak a chawkchhuak nghal a ni.

Tunlai hi grape thar hunlai a ni a, grape rah hi chhe hma taka leh dahthat rei theih loh anih avangin Hnahlan leh Champhai lama society chuan an lei mek a. Chutih rual chuan sawrkar hawi lam tur hi a la chian loh avangin dinhmun awkai takah an ding mek a, beiseina in sawrkar an thlir mek a ni. Tun ang renga grape hralhna kawngah harsatna a awm anih chuan cheng nuai tam tak a ral dawn a, kuthnathawktute rilru pawh a hnual nasa hle bawk ang.

Hetia kuthnathawktute hawi lam tur pawh chiang lova an awm reng hi a fuh lo a. Kan rama political party hrang hrang, kohhran leh tlawmngai pawl te hian grape hi chu an do lo niin a lang a. Chutih laia sawrkar a ngawi tlat mai hi chu a fuh lo tak zet a ni.

Tunhnaia Millennium Centre a grape tui man chungchangah pawh END Minister zahawm takin zu an kawl tel nia media lama a sawi laiin mi thahnemngai ten RTI hmanga zawhna an zawhna, department lamin a chhanna ah zu man tel a awm lo niin a lang a. Grape hian sawizui a hlawhin politics a hamthatna atan hman kan tum ta hial em ni a tih theih rum rum a. Kuthnathawktute hi chu politics ball ah hmang lo hram ang u.

Tuna kan mamawh ber chu 'Wine rules fel tak neih thuai' niin a lang a. Kuthnathawktute grape kan chintir laia a tharchhuah kan man sak leh hi chu a kalphung lo hle mai. Chuvangin grape chungchangah hian sawrkar hi thle mai mai lovin a dinna chiang takin puangchhuak thuai teh se. 

Share now