Aizawl; Mizoram People Conference Thalai te chuan Mizoram a rorel mek Congress sawrkar chu khua leh tuite humhim tawklo leh hemi kawnga hmalatute pawh dodal zel ah an ngai tih an sawi. Nimin Aizawl Press Club a thuthar lakhawmtute an kawm naah MPC Thalai president V.Lalthazuala chuan Bairabi dai, Mizoram leh Assam inrina Zophai a Pu C.Lalrinchhana leilet thlam, tunhnaia Assam mi nia hriat ten an thiah sak tak, sak that tuma hma an lak dan a sawi a. MPCY president chuan Assam-Mizoram ramri chu reserved area chhung a ni tiin huan thlai nghet phun phal a ni lo a, in pawh a ngheta sak phal a ni lo nia sawiin mahse heti chung hian Assam lam chuan Mandir sa in huan thlai kumhlun chi pawh an phun niin a sawi a. Heng te hi Mizoram leh Assam atangin objection a awm lo a, mahsePu C.Lalrinchhana thlam chu August ni 21 khan sawithiah a ni a, August ni 27 ah DC level a inbe tura tih a ni chungin Assam lam hi an kal duh lo a, tun thlengin inbiakna mumal a la awm thei lo a ni, a ti. MPCY president chuan Assam Police leh Forest mi ten thlam an thiat ngawt mai chu an rilru a na tak zet tih sawiin, "zoram hian chhantu a mamawh tih hriain kan penchhuak a. Min tawiawmtu tura kan ngaih Police te chuan remti lovin min dang ta zawk a. Buaina a punlun kan hlauh avang leh hnamdangte mit hmuha mualpho kan hlauh avangin thinlung na takin kan kir leh ta a ni," tiin a sawi bawk.