ZALEN August 31, 2025:: Mizoram sawrkar chuan July 27, 2025 thleng khan sawhthing quintal 3,45,030.02 a lei tawh a. Kuthnathawktute sawhthing lei leh support price pek nan Rs vbc 70.19 a seng tawh. Sum hmuh let hi Rs vbc 12.78 niin Agriculture Minister PC Vanlalruata chuan tun hnaia session neihah a sawi bawk.

ZALEN RTI zawhna a chhannaah SPIO, Agriculture & Farmers Welfare Department chuan July 21, 2025 thleng khan sawhthing lei nana senso - administrative cost, transportation, packing materials, grading, loading leh unloading, auctioning, weighing, storage atan Rs. nuai 296.60 hman tawh a ni tih a tar lang a. Secondary Collection Centre (SSC) kaltlang lova lei leh hralhte chu sawrkarah record a nih loh avangin support price pek theih a ni lo tih a sawi.

Sawrkarin sawhthing a lei sate tihral zat leh hlep/hloh zat zawhna chhangin SPIO chuan lei tan tirha buffer stock, Sairanga phurh khawm 17,438 qtls tihral a ni a. SCC tin atangin hralh a ni bawk a. Sawhthing lak hun chhung hi khar ni tawh mah se farmer-te hnenah support price hi pek kim a la ni lo va, pekchhuah mek a la nih avangin hlep/hloh zat sawi theih mai a la ni lo a ti.

SPIO chuan sawhthing marketing atan society din 672 an awm tih a sawi a. Society-te hian sumdawng hnenah an lei duhna rate anga lo tihrala, Rs. 50 per kg a tlin lohna sawrkarah support price dil chhuah leh mai theih a ni em tih zawhna chu a theih loh thua chhangin sawrkara support price claim tur chuan SCC kaltlanga an hralh ngei ngei a ngai tih a sawi a. Sawhthing dawn leh hralh zat record hi SCC ah vawn a ni a, support price hi SCC-in District Agricultural Marketing Committee (DAMC)-ah an claim a, DAMC chuan sawrkarah support price dilna an submit thin tih a sawi.

Thlai thar leina budget-a dah chungchangah thlai thar lei nan/price support pek nan sawrkarin kum 2023-24 khan Corpus Fund for Market Assurance of AgriHorti Commodities a din a, he fund ah hian Rs. vbc 110.00 a dah a ni a ti a. Support price pek chungchang hi Bana Kaih (Handholding Scheme) hnuaia awm a nih angin hemi atana sawrkarin budget a ruahman atang hian leina tur hi a tul anga hman mai tura ruahman a ni tih a sawi bawk.