ZALEN October 29, 2024 : MNF chuan thuchhuah siamin Zirlai tam takin an mamawh leh an innghahna Scholarship sem chhunzawm lova a khaihlak chu pawi an ti a. A changtu Minister ber che chhuak lova, zirlai pawl chetchhuah ngaia a awm chu thil zahthlak tak a ni an ti.

Zirlai pawlte hmalakna anga sum pawh Central aṭanga release a nih tawh laia a dawngtu tur zirlai, mamawh ngawih ngawihtute hnena sem chhunzawm a la ni lo cheu chu sawrkar inthlahdah vang a ni. A rang thei ang bera zirlaite hnena Central atanga an sum dawn tawh hi Mizoram Sawrkar hian pechhuak thuai turin an phut.

MNF chuan, "State Sawrkarin a tum ve tur a tihfel har avanga zirlaite tawrhna hi chingfel thuai turin kan phut a. Mipui hnena inthlahrung hauh lova chhiah sang an lak belh laia mamawhte hnena pekchhuah tur an pechhuak hreh tlat hi, Mizoram sawrkarin mipui leh zirlaite a ngaihthah zia tichiangtuah kan ngai a."

"Kan Sawrkar hotuten anmahni hamthatna tura inhaivur kawngah zak miah lova chak taka hma an lak lai leh sum leh pai an sen lai a, zirlaiten an chanvo hun rei tak dawng thei lova harsatna an hmachhawn leh an zirna kawng tibahlah thei tur zawnga sawrkar inthlahdahna hi kan dem takzet a. Lal ngailo lal tate lalna kha tak hi mipuiten an hmuhhmaih lova, inchhirna rilru an put phah ta hial a ni tih hre turin ZPM kaihhruai sawrkar hi kan duh a ni," an ti.