Aizawl August 30, 2024 : Vawiin khan Mizo Hnam Run chhung inkhawm a thu sawitu Prof. F. Lalnunmawia, Ex-MLA chuan "ZPM sawrkar hian an tum dan leh mipui beisei ang a pha lo chho hle a, ram kaihhruai hi field kotlang atanga duhthu lo sam ang ngawt a ni lo tih an hre chho mek a ni," a ti.

"ZPM hian an thupui pakhatah 'Ram rorelnaa Pathian ram tun din' tih neiin 'Kan tha bik tur a ni a, kan danglam bik tur a ni' tiin thil tha tih tum tam tak an zuar a nih kha. Tunah an sawrkar chuan thla 8 hmel a lo hmu ve ta a, an intiamna te ti hlawhtling tur chuan hun a la reilo deuh bawk nen mipuiin an la ngaichang rih a; chutih rualin 'Kan ti ve lo ang' an tihte an tih ve leh tho si avang hian anmahni vote tu mi tam tak an hnual tan mek a ni," a ti.

"Nasa taka MNF sawrkar sum puk sawisel thin khan an han sawrkar ve a, a puk uar uarah an tang a; Restricted tender sawisel thin khan restricted tender lem leh Departmental work lem an uar chho hle tih chu mipui ti ti a ni. Chutih laiin Aizawl khawpui chhung kawng chhiat ber hun kan tawng mek a ni," a ti bawk.

Danglamna hmuh tur a awm loh thu sawiin, "Kalphungthar an sawi làr hle laiin an kal dan erawh danglamna hmuh tur a vang hle a, an Budget pharh hmasak berah opposition an nih laia an lo sawisel thin ang tho an pass a, an kal danah sawrkar inrenchem lam an hawi lo a ni. Tin, mipui sawrkar din a, Unit system tibo tura insawi thin khan Silpauline tak ngial pawh unit kaltlanga dil a ngai leh si," a ti.

"ZPM sawrkar hi an han kal rei deuh anga, mi tamtak duhthu sam anga ram hruai harsatzia an hmu chho in a rinawm; chutih rualin kan ram hruaitu hluite thatna tam tak mipuiin an hmuh thiam phah ngeiin ka ring," a ti bawk.