ZALEN August 12, 2026: Nungcha Humhalhna Dan (Wildlife Protection Act, 1972) bawhchhiaa puh, RT Thanga (41) s/o Lana, Kawnpui Hmarveng, Kolasib District chu vawiin khan District Court, Kolasib-a hruai a nih hnuah District Jail-ah dah luh a ni.

RT Thanga hi Mizoram State Animal, Saza (Capricornis rubidus) kap a, a sa leh a lu (trophy) kawlah puh a ni. Range Officer, Kawnpui Forest Range hmalaknain man a ni a, hemi ni vek hian District Court, Kolasib-ah hruai nghal niin District Jail-ah dah luh nghal a ni. A hnen atang hian Saza kahna silai (12 Bore SBBL) leh Saza sa deep freezer chhunga dah 10.5 kg leh a kawchhung (a chek) chhum hmin sa bakah a lu (trophy) te man tel a ni a, hengte hi Judicial Magistrate First Class thupek angin, Kolasib District Honorary Wildlife Warden H. Vanlalnghaka hova tihchhiat leh phumbo nghal an ni.

Saza hi Nungcha Humhalhna Dan hnuaiah venhimna sang ber (Schedule-I) hnuaia awm a ni a, tihhlum, a sa ei leh lei/hralh bakah tihhlum tuma veh emaw pelh te hi khap tlat a ni. Ti lui man chhuahte chu thiam loh chantir an nih chuan kum 3 atanga kum 7 chhung lungin tan leh pawisa Rs. 25,000/- (Singhnih sangnga) aia tlem lo chawitir a hrem theih an ni.

Kolasib Forest Division chuan Nungcha Humhalhna Dan bawhchhe lo tur leh kan ram rohlu nungchate min humhalhpui turin mipuite a sawm nawn leh a ni.