Aizawl: State Bank of India chuan an hnena account nei te atanga TDS (tax deducted at source) an lak thin chu an titawp a. SBI a account nei te chu harsatna an tawh loh nan tribal certificate thehlut thuai turin an ngen.

Nimin chhun khan Aijal Club-ah chanchinbumi leh Central YMA office bearer te kawmin SBI hotute chuan TDS lak thin chu tihtawp a ni tih an sawi a. SBI Regional Manager LP Lalchangkima chuan sawrkar laipuiin nikum atangin TDS hi la turin a hriattir tih sawiin he dan hnuaiah hian tribal te chu chhiah awl tur an ni chungin lak a ni a. YMA leh mi thahnemngai te beihna avangin tunhnai khan he thupek hi sut a ni tih sawiin lawmawm an ti hle tih a sawi a. "TDS laka kan him nan tribal certificate a rang lama thehlut turin min dawrtute kan ngen a, he certificate hmang hian TDS chu awl kan nih tawh dawn avangin kan customer te ngai pawimawh turin kan ngen a ni," a ti a. Tribal Certificate chu mahni home branch ah theuh thehlut turin Account neitute a ngen bawk.

SBI Regional Manager chuan customer service ah theihtawp an chhuah tih sawi bawkin Customer Service Committee dinin SBI thawktute chu a khat tawkin an fuih thar reng niin a sawi a. Tunah hian Branch hrang hranga cctv footage chu an lakhawm mek nia sawiin April ni 1,2020 hian staff te kokhawmin a tha lo lai chu big screen ah an entir dawn niin a sawi bawk.