ZALEN July 1, 2024; Court in SBI Mission Veng Branch, Aizawl a Branch Manager hlui Lalkhomang Guite leh a thurualpui Gary T. Haokip te kum li ve ve lungin tang tur leh Rs. Nuai 10 ve ve chawi turin a hrem.

Thubuai leh Court thuremna kimchang :

S.R. (PCA) No. 05 of 2012

He thubuai hi November, 2006 leh October, 2007 chhungin chutih hunlaia State Bank of India, Mission Veng Branch, Aizawl a Branch Manager ni thin Pu Lalkhomang Guite leh a thurualpui Sacred Heart Society neitu Pu Gary T. Haokip te, Mizoram Rural Development Society, Aizawl a Chairman Pu K. Lalremtluanga te, Sacred Heart Society a thawk Pi Rosangkimi Ralte te leh Upliftment of Backward Women Self Help Group-a Chairman Pi Thantluangi te chu Self Help Group hrang hrang hminga loan pekchhuah leh chuta tanga sumpai lo eiru a puhna a ni a.

Hemi thubuaiah hian court hian dt. 28-06-2024 khan SBI, Mission Veng Branch-a Manager ni thin Pu Lalkhomang Guite leh a thurualpui Sacred Heart Society neitu Pu Gary T. Haokip te chu section 120-B r/w 420, 468, 471 IPC leh section 13 (2) r/w 13 (1)(d) of the P.C. Act, 1988 angin thiamloh alo chan tir tawh a, court hian an ni pahnih hi kum li (4) chhung ve ve lungin tang tur leh ₹ 10,00,000/- (cheng nuai sawm) ve ve chawi tura hrem an ni a, an pawisa chawi tur hi an pe theilo a nih chuan kum hnih (2) dang chhung lungin tan in an tlak thei ang.

Hemi thubuai-a lungin an lo tan tawhna erawh an tan hunchhung tur atan hian chhiar tel tur a ni thung.

Court in hremna a pek nat chhan a tarlan te chu:-

1. Pawisa khawih ching pen zah hi a tam hle.

2. An dan bawhchhiatna hi a danglam hle a, ngampa takin chinchang hrelo zawk te hmangin sumpai an ti chingpen a, midang tan mai bakah anmahni rilru insiamthatna atan hremna na zawk pek hi a tul.

3. Pawisa chawi tir tur zah tukna ah hian Prevention of Corruption Act, 1988 hnuaia section 16 in an pawisa khawih chingpen hisap tur a tih hi ngaihtuah tel a ni.