ZALEN July 29, 2026 : MSU General Headquarters chuan vawiin khan Executive Meeting an nei a, Mizoram Government Adhoc Aided High School Teachers’ Association te nawrhna chungchang, MPSC hnalak a dik lo awm fo chungchang leh Zirlai Scholarship dilsaktu Zirtirtuten pawisa zirlaia an lo lak chungchang te an rel.

Mizoram Government Adhoc Aided High School Teachers’ Association ten an School Provincialised ngiata an nawrhnaah zirlaiten zirna an dawn mumal loh a hlauhawm avangin sawrkar nena inbiakremna nei thuai se MSU chuan an duh a. Hemi atan hian a tul anih chuan Palai hna thawh an hreh loh tih an sawi.

Zirlaiten Scholarship an dilnaah, dilsaktu School/Institution thenkhatin naupangah pawisa an la thin chu tha an tih loh thu an sawi a, hmun thenkhatah zirlai naupang pakhat zelah Rs150 chawitir an awm nia hriat a ni a, heng Institution te hian an pawisa lak thin hi titawp nghal turin leh zirlai hetiang tawk an awm anih chuan MSU General Headquarters ah thlen turin an ti.

MPSC hnalak a diklo awm thin chu MSU chuan tha a ti lo a. Mizoram Sawrkar hnalatu berah tihsual leh sawisel ngaia an awm fo chu, tun hnua a thlen leh tawhlohna turin hmalak nise an ti bawk.