ZALEN November 16, 2023 : Mizo Zirlai Pawl (MZP) chuan engemaw chen atanga an hmalaknain awmzia a neih loh avangin, Zirlaiten Scholarship an hmuh hma chuan MZP Pisapui-ah tiamchin awm loin zanin November 16, 2023 atangin chaw nghei a lungawi lohna lantir an tum.

Vawiin khan Mizoram Scholarship Board Office kawtah zirlaite Scholarship 2nd Installment pek chhuah har vanga lungawi lohna lantir nan leh Scholarship sum pekchhuah vat phutin a ni thum nan punkhawm chhunzawm a ni a. MSB office pawh khar a ni.

MZP hruaitute chuan, scholarship pek chhuah vat a nih theih nan tukin khan Mizoram Chief Minister Zoramthanga chu a office-ah an hmu a. Zoramthanga chuan, Zirlaite scholarship 2nd installment hi sawrkarin Mizoram scholarship Board account-ah a thun fel tawh a. Election neih zawh tawh a nih avangin Party advantage awm thei thil a ni tawh lova, sem thuai nise a duh thu a sawi a. Zirlaite scholarship pe thuai turin Higher & Technical Education Department hotute leh Mizoram Scholarship Board hotute a hrilh nghal bawk.

Higher & Technical Education Department Secretary Esther Lalruatkimi pawh a office-ah hmuh nghal niin, Election Commission phalna tel lo chuan a sem ngam loh thu a sawi a. MZP chuan Zirlaite mamawhna hria a sem mai turin leh, Election Commission lam pawh na taka nawr turin a ngen nghal a. MZP chuan Higher Technical Education Department Secretary chu zirlaite tana ding ngam tawk lovah an ngai a, an dem takzet tih an thuchhuah siamah an tarlang.

Heng an harsatna thlen hian awmzia a neih loh avangin Zirlaiten Scholarship an hmuh hma chuan MZP Pisapui-ah tiamchin awm loin zanin atangin chaw nghei a lungawi lohna an lantir a ni.

Scholarship Second Installment pawisa la dawnglo hi zirlai 19,495 an awm a, Mizoram Chhunga zirna in 36 atangin zirlai 5,023 bakah Pawl XI leh XII zirlai 11,462 leh Mizoram pawna awm zirlai mi 3,010 in an la dawng lo a ni. MZP chuan zirlaite hnenah pe chhuak vat turin thuneitute a ngen nawn leh a ni.