Aizawl: Post MatricScholarship semchhuah mekah kumdang aiin Account ah a lut tha a, Account a luh loh avanga zirlai buai an tlem hle. Mizoram Scholarship Board Secretary JH Zoremthanga hnen atanga Zalen thudawn danin scholarship la hmulo te hi an hnenah an bank account update nen in report turin an hriattir tih a sawi a, mahse kumdang ngaihtuah chuan buai an tlem hle niin a sawi a. “Tuna kan hnena lokal tam ber hi Account number leh IFSC Code zia dik loh vang leh Account thi tawh te an ni ber a, midang chuan harsatna an tawk lem lo niin kan hria,” tiin Zalen a hrilh. MSB Secretary chuan harsatna neite chu an theih ang angin an lo chinfelsak tih sawiin, “Account dik lote kan siam diksak a, kar khat nghak phawt turin kan ti a. hetia kan nghah tir chhan hi nikum lamah ni 2/3 hnu lekah a lut lo nia sawi an awm avangin kan thun nawn a, lut nawn a awm vangin nghak hrih turin kan ti a ni,” a ti bawk. Minority Scholaship chungchang zawhna chhangin Mizoram Scholarship Board Secretary JH Zoremthanga chuan, “Minority hi kan state mipui tam dan a zirin central in quota min pe a, kuminah hian kan quota chu 11,900 a nih laiin mi 70,000 vel diltu an awm a, chuvangin hmu lo tur an tam dawn a ni,” a ti. Minority scholarship chu kum khata nu leh pa, cheng nuai 1 lalut tling lote chauhvin an dil theih a ni tih a sawi a; mahse, school tam tak chuan an zirlai zawng zawng an diltir nia an hriat thu a sawi a. “A dawng thei chauh hian dilin dawng se kan duh ber a ni,” a ti a. Mizoram quota bak chu tihngaihna a awm lo niin a sawi bawk.