ZALEN November 13, 2023 : Mizo Zirlai Pawl (MZP) General Headquarters, Aizawl chuan vawiin khan MZP Pisapui President room-ah Extended OB meeting neiin, Tribal Scholarship Second Installment zirlaite'n an la dawn loh chungchang sawiho a ni a. November 14, 2023-ah Sit-In-Demonstration neih an rel.

Meeting hi MZP President H Lalthianghlima’n a kaihruai a, Tribal Scholarship Second Installment la dawnglo ten an dawn thuai theih nan Mizoram sawrkar hnenah vawi tam tak a thlen tawh a, Scholarship file pawh umzui a ni a. Tun thlenga zirlaiten an chanvo an dawn tur Scholarship an la dawn loh avangin naktuk November ni 14, 2023 (Thawhlehni) zing dar 9 hian Mizoram Scholarship Board Office (Dawrpui vengthar) kawtah Sit-In-Demonstration neih a rel a ni.

He hmalakna hian awmzia ala neih loh chuan zirlaiten an chanpual scholarship an dawn vat theih nan MZP chuan a tawp thleng hmalak zel a tum bawk.

MZP chuan, "Zirlaite scholarship second installment tang zat hi cheng nuai 1,787.48 zet a ni a, heng pawisate hi Mizoram sawrkar kutah a luhna a rei tawh," an ti. Zirlaite hnenah pe chhuak vat turin thuneitute a ngen nawn leh a ni.

Scholarship second installment pawisa la dawnglo hi zirlai 19,495 an awm a, Mizoram chhunga zirna in 36 atangin zirlai 5,023 bakah Pawl XI leh XII zirlai 11,462 leh Mizoram pawna awm zirlai mi 3,010 in an la dawng lo a ni.

MZP chu zirlaite tan a ding zel dawn a, hma a laknaah hian zirlaite leh mipuite thlawpna a ngen bawk a ni.