Aizawl: Mizoram Scholarship Board chuan Ningani kalta thleng khan tribal scholarship ah vaibelchhe 30 chuang an thun tawh a, a bak hi sawrkar laipui atanga sum hmuh veleh zirlaite account ah thun leh an tum. Mizoram Scholarship Board thawktute hnen atanga Zalen thudawn danin tribal scholarship hi BA chin hnuai lamte chu an account-ah thun a ni tawh a, a chung lamte dawn tur hi sawrkar laipuiah buaipui mek a niin MSB Secretary JH Zoremthanga chuan Delhi-ah sawrkar laipui hotute a dawr mek tih an sawi a. Tuna sum beisei vaibelchhe 11.95 hi hmuh a nih veleh MA zirlaite account-ah thun leh nghal tum a ni tih an sawi bawk.