ZALEN August 23, 2026: Mizoram Education Reforms Committee chuan sawrkar leh kohhran thawhhona atanga school enkawl dan tur Public Private Partnership (PPP) atana rawtna an pawm tawh tihhlawhtlin dan tur leh ruahmanna (Implementation Schedule) an duang. 

Ruahman ang chuan September atanga November, 2026 chhung hian sawrkarin tih tur hrang hrangte tiin, December, 2026-ah chuan school thlang fela Memorundum of Understanding (MOU) te tih fel tum ni se, an ti a. Kum 2027 academic session tan hunah PPP mode school-ten hna an tan ve theih nan school inhlan felna (hand over to partner) chu February, 2027-ah neih tum ni se, an ti bawk. 

Zirtawpni khan Mizoram Education Reforms Committee (MERC) thutkhawm vawi 17-na chu an Chairman Dr. Vanlalthlana, School Minister hovin Directorate of School Education Committee Room-ah neih a ni a. Mizorama zirna siamthatna tur hmachhawp hrang hrang kalpui dan tur an rel. 

Meeting chuan Draft Mizoram Education (Transfer & Posting of School Teachers) Rules, 2026 pawh hman theih tura pawm tawh chu siam that ngai nia langte siam that a ni a. Sawrkara dah luh hmain Service Association te leh helam kaihhnawih pawl hrang hrangte ngaihdan leh thlir dante enho leh ni se, an ti. Chumi zawhah chuan sawrkarin dan ang taka kalpui turin thil tulte a buatsaih ang a, hun remchang hmasa berah Cabinet Agenda turin ruahman tum ni se, tiin an rel.

Heng bakah hian 17th MERC meeting hian tunlai Mizoram chhunga zirna lam hawi thil pawimawh tak tak te an sawiho a. Mizoramah zirnain hma a sawn mek chu lawmawm an ti a. Zirtirtute, office hrang hranga thawktute leh kil hrang hranga zirna hmasawnna atana beitute theihtawp chhuah zel turin an ngen a ni.