Covid-19 avangin khawvel pum a buai a, eizawn a nghawng a. Zirna lam pawh nasa takin a nghawng a, zirlai ten school an kal thei lo a. Mizoram pawh he hri hian nasa takin min nghawng a, sawrkarin school hawn duh mah se, vawiin thlengin a hawn hun tur a la hriat theih loh a ni.

Nikum lamah school hawn han ni deuh uk uk mah se, hripui avangin tihtawp leh a ni a, kuminah pawh kum thar January ni 15 atangin school hawn tan tum ni mah se, hri leng lakah mipuite an la him tawk lo nia sawrkarin a hriat avangin hawn a la ni dawn lo a. School Education Department chuan kumina school hawn hun atana an lo tinzawn tawh January ni 15, 2021 chu Health Department leh State Disaster Management Authority te an rawn hnuah zirlaite tan a la him tawk lova an ngaih avangin school hi hawn a la ni dawn lo a ni.

Zirlaiten regular class an kal theih loh avang hian nasa takin an zirna in a tuar a. Sawrkarin ngaihtuahna dang sengin online hmang ten class neih a ni a, mahse hei hi zirlaiten an chhwr tangkai tawk lo hle niin a lang. Online hmang hi chuan inthlahdah a awl bakah zirtirtute nen hmun leh hmuna harsatna sawiho leh inpawhna ang chi kha a awm tak tak thei lo a. Zirlaite zingah pawh online hmang chuan inthlahdah a awlin a thatchhe deuh tan phei chuan awmzia a nei tlem hle ang. Mahse, kan hun tawngin a zir miau loh avangin hei bak chu tih theih a awm miau si lo.

Tun ang renga kan kal chuan zirlaite hian an tuar lutuk dawn a. Exam chi hrang hrangah phai lam zirlai thiam tak takte nen inel tur an nih bawk si avangin ngaihtuahna sen zau a tul khawp mai. Sawrkar hian zirlaite leh zirtirtute himna leh an tawrh loh theih dan ber tur ngaihtuah chunga ruahmanna a siam thiam a pawimawh hle a, fimkhur tak si; mahse, kan zirna in a tuar loh theih dan ber tur ngaihtuah thiam se a duhawm hle.