ZALEN March 24, 2026: Academic Session 2026–2027 atana State Council of Educational Research and Training (SCERT)-in a buatsaih School Textbook siam leh sem chhuah hna zawhfel a nih thu sawrkar thuchhuak chuan vawiin khan a tarlang a, March 15, 2025-a zawh fel a nih hnuah Samagra leh Textbook Dealer-te hnenah hlan vek a nih tawh tih a buaipuitute chuan ZALEN an hrilh.

Academic Session tan hmain Textbook-te hi Samagra leh Textbook Dealer-te hnenah hlan nghal vek a ni a, District zawng zawnga zirlaite hnenah sem a nih theih nan Mizoram chhunga District tinah heng zirlaibute hi thlen hman vek a ni bawk.

SCERT School Textbook siam leh buaipui hna hi Department of Information & Public Relations, Printing & Stationery (IPRP&S) hnuaia Directorate of Printing & Stationery chuan an thawk a, tuna he hmalakna hi School Textbook Quality siamthatna kawngah hmalakna thar niin Textbook Cover Lamination pawh tih tel a ni a. Hei hi a hmaa tih ngai loh niin, a hma aiin a senso sang mah se, zirlaite tana hman tlak leh deih rei zawk tur a nih avangin hlu zawk turah lehkhabu buaipuitute chuan an ngai.

Academic Session 2026–2027 atan Textbook Print Order hi SCERT atangin 2025 kum tawp lamah dawn a ni a. Soft Copy Final chu 2026 kum tîr lamah peih fel a ni. Academic Session hun hi April thla atangin March thla ni 23-ah sawn a nih tak avangin, School tan hma ngeia Textbook-te siam zawh tumin hmalak a ni a. Academic Session sawm hma a nih tak avang hian School Textbook a hma lama peihfel tumin Directorate of Printing & Stationery chuan hma a la a. Dummy Copy siam, Proof Reading, Correction leh a tul dangte buipuii Textbook Print, Binding leh Lamination hna hi Session tan hma, March 15, 2026 hma khan an zo fel a ni.