Chennai: Ram 24 fuankhawmna India International Science Festival 2017, Chennai-a neih mekah Mizoram atangin Science, Technology & Innovation Council, Planning Department stall chu zirlaiten an bawh hle a. Hetih lai hian Festival hawngtu Dr.Harsh Vardhan, Union Minister for Science & Technology chuan hmarchhak tan Central chuan sum a sen tam thu leh Biodiversity lam ngaih pawimawh a nih thu a sawi a, Mizoram S&T hmalaknate chu theihtawpa bawhzui a nih thu a sawi bawk. Minister chuan Zalen zawhna chhangin nuai 1800 senna tur project sanction turin theihtawpa bawhzui a nih thu a sawi a. Dr Vardhan hian Mizoram Bioresource Development Centre dinna tur lungphum January, 2017 khan MZU-ah a rawn phum tawh a ni. Minister chuan Science & Technology lamah hmarchhak a than theihna tur chuan scientist-ho zingah thawhhona tha a awm a pawimawh tih a sawi a, hriatna inthleng tawn zung zung a nih chuan hmasawnna a awm a beisei thu a sawi. Minister hian hmarchhak biala Science leh Technology tihchangtlun nan nuai 20,000 chuang sum dah a nih tawh thu leh sum pawh pekchhuah vat a beisei thu chanchinbumite a hrilh a. Inbiakpawhna tha tawk lo chungchangah BSNL pawhin connectivity a that theihna turin optic fibre kilometre nuai 2 chuang a phum tawh a ni, a ti a. Science hmanga khawpui leh thingtlang nunphung hrutrual chu sorkar tum pawimawh ber pakhat niin a sawi bawk. Dr Harsh Vardhan chuan halpuah leh hal mawi chungchangah mi thiamte chu boruak tichhe lo tur chi siam chhuak turin a ngen bawk a ni. IISF hi Chennai-ah a rualin hmun 5-a neih a ni a, science kaihhnawih inphochhuak stall 300 chuang awmin, “Hma kan sawn viau a, IISF-ah hian hmarchhak zingah tlawhtu ngah leh stall nei tha ber kan ni a. Mizo zirlaite zingah hian Science tihlar hrim hrim hi kan la mamawh hlein kan hria,” tiin stall viltu zinga mi Samuel Lalmalsawma, Senior Scientific officer chuan Zalen a hrilh bawk a ni. Kumin Science festival-ah hian ‘Science for new India’ tih chu thupuia thlan niin October ni 13-16 chhung neih tur a ni a, Yeahfesh Osman, S&T Minister Bangladesh, Abdul Latif Roshan, H&TE Minister Afghanistan te chu khualzahawm an ni. Naktuk tlai dar 4-ah IISF 2017 hi Vice President Venkaih Naidu-an a khar dawn a ni.