Aizawl: Directorate of Science & Technology chuan Zirtawpni kalta khan an conference room-ah Mizoram thalai scientist leh zirbing miten an thil zir leh hmuhchhuah khawvel pum huap inkhawmpuia an sawi chhuah theihna tura tanpuina dan ‘Science & Technology International Travel Support Scheme’ inhrilhriatna leh he scheme hmanga khawvel huap inkhawmpuia kalte hnen atanga report ngaihthlakna hun an hmang. Inhrilhhriatna huna khuallian Planning Secretary Dr. C. Vanlalramsanga chuan mithiam bikte tana sawrkar ruahmanna hi chhawr thangkai thei tura thalaiten tan an lak zel a duh thu leh he scheme hian ram hmasawnna tak tak a thlen ngei theih nan Mizo thalaite nasa leh zuala tan la turin a sawm. He scheme hnuaiah hian Mizorama cheng nghet scientist leh mithiam bik, khawvel huap inkhawmpuiliana an thil zirbing leh hmuhchhuah sawichhuak tura tlingte bakah khawvel huap inkhawmpuia thusawi tura sawmbik leh inkhawm kaihruai tura sawmbik ten tanpuina an dawng thei a. Khawvel huap University tha thlanchhuaha thusawi turte phei chu duhsak bik an ni dawn a ni. He scheme hmang hian PUC-a Zoology zirtirtu Associate Professor Dr. H.Lalthanzara chuan Mizoram atanga changpat chi thar a hmuhchhuah chanchin International Symposium on Earthworm Ecology vawi 11-na leh International Earthworm Congress hmasaber ni bawk June 24-29, 2018 chhunga Shanghai, China-ah a puangzar tawh a. Dr. Lalrokima Chenkual-in March ni 15-16, 2018 chhung khan International Conference on Disaster and Emergency Management vawi 20-na London, United Kingdom-ah thu a sawi bawk. Hei bakah hian he scheme atangin Pachhunga University College-a Assistant Professor Dr. Laldinpuia’n November ni 24-28, 2018 hian Cairo, Egypt-ah paper a present dawn bawk a ni.