Scientist-te chuan thlai chi khat, thisen sugar level zaa 50-a tihhniam thei chu an hmuchhuak a – zunthlum vei enkawlna atan pawh a tha hle tih an hmuchhuak. 

Type 2 diabetes vei te hian an ril bawh atanga thisen thlum lo tidanglama khuahkhirh thei tur insulin an siam chhuak thei lo a, chu chuan thisen (zun) thlum chu hlauhawm tak thlengin a tih san phah thei a ni.

The Endocrine Society annual meeting vawi 97-na, San Diego-a an neihah purunsen (onion bulb) hi zunthlum damdawi metformin nena ei kawpin nasa takin zun thlum leh cholesterol level a tihhniam thei tih an sawi.

Lead study ziaktu Anthony Ojieh, Delta State University, Nigeria mi chuan, “Purunsen hi a man tlawm a, lei mai tur a tam bawk a, taksa tana chaw tha (nutritional supplement) atan hman tlanglawn a ni tawh bakah zunthlum vei te enkawl nan pawh a tlak hle a ni," a ti. 

He theory hi sazu-ah enchhin a ni. Sazu pathum damdawi thiamna hmanga zunthlum vei tir te chu purunsen atangin an dose tur tur lak chhuah chu pek chhin an ni a, damdawi hian nghawng tha a neih leh neih loh enchhin a ni. 

An dose pek dan chu taksa rih atanga tehin kilogram khat zelah 200mg, 400mg leh 600mg te a ni. Zunthlum damdawi leh purunsen ni zunthlum vei lo sazu pathumah enchhin a ni bawk.

 He zirchianna hian, zunthlum vei sazu zingah, taksa rih zawng kilogram khata 400mg leh 600mg pekte chuan an thisen sugar level chu nasa takin a tihniam tih hmuhchhuah a ni. Heng sazu te zunthlum level hi zaa 50 leh zaa 35 lai tein a tihniam a ni. 

Purunsen hian zunthlum vei sazu te cholesterol level zawng zawng pawh a tihniam tel bawk a, 400mg leh 600mg te hi an thawk chakin nghawng an nei lian ber a ni.

He zirchiannaa an hmuhchhuah dang leh chu purunsen hian zumthlun vei lo sazu te taksa rihna a tih pun laiin sazu zunthlum vei te rihna erawh a pun ve phah lo thung. 

Ojieh chuan,“Purunsen hian calorie a pai tlem em em a ni. Amaherawhchu, pangti mur hnathawh (metabolism) rate erawh a tisang thung niin a lang a, chu chuan chawi ei a titui a, chaw ei tam a awl phah a ni," a ti. 

Sawi zawmin,“Purunsen hian thisen a glucose a tihniam em tih erawh zir chian that leh deuh a la ngai dawn a ni," a ti.