Scotland sawptu India an la him bik chuang lo

Admin - Nov 07, 2021

Twenty20 World Cup-ah hian India chuan semi-final lut turin Namibia an hneh ngei a ngai bakah team tha New Zealand chu Afghanistan-in an hneh ngei a ngai bawk

India chuan wicket riat zetin an khingpui Scotland an hneh a, semi-final lut turin beisei la nei mahse, an dinhmun a him rih lo. Dubai-a khelh mek Twenty20 World Cup-ah hian India chuan semi-final lut turin Namibia an hneh ngei a ngai bakah team tha New Zealand chu Afghanistan-in an hneh ngei a ngai bawk. 

He inkhelhah hian India chuan an khingpui hi an sawp hle a, bowl hmasak thlang India lamin over 17.4 lekah Scotland lam hi an vawm hlum vek a, Scotland hian run 85 chiah an siam hman. Cricket ngaina ram India tan target phak huphurhawm a ni lo. An han vaw ve ta a, over 6.3 chhung lekin an target an tlin a, wicket hnih out-in wicket pariat ngawt an la chuang. 

India hian bowl hmasain Mohammed Shami leh Ravindra Jadeja ten wicket pathum ve ve lain run 30 chiah an vuak chhuah tir a, Jasprit Bumrah pawhin wicket pahnih vawm out-in run 10 chiah an siam thei. 

Pakistan leh New Zealand laka tlawm India batsmen te an che tha hle a, over 6.3 chhung lekin an target an vaw chhuak. KL Rahul leh  Rohit Sharma ten hmahruaiin Punjab Kings captain hian ball 18-ah run 50 a siam a, Rohit Sharma'n ball 16-ah run 30 siam ve bawkin anni pahnih ringawt hian run 80 an tlin der. 

He inkhelhah hian India hi chetha hle mahse, semi-final luh lohna chance a sang rih hle a, semi-final lut tur chuan Afghanistan-in New Zealand an hneh ngei a ngai bakah India hian Namibia an hneh ngei a ngai bawk.

India spinner Ravindra Jadeja chuan,"Kan net run-rate siam tha turin margin tam tham taka chak kan mamawh tih kan hria a, 100% in pekna nena khelin kan tum kan hlen a ni. Tun anga thaa kan khelh chhoh theih chuan tu team mahin min hneh thei lovang," a ti. India captain Virat Kohli pawhin,"Kan khel tha tak zet a ni. Kan tum angin kan khel a, kan nihnaa kan let leh hi kan lawm tak zet a ni," a ti. 

Share now