ZALEN August 17, 2026: Serchhip DC Office Road Inspection Team' te chuan NHDICL hnuaia Kram Infracon Pvt Ltd ten Khumtung to Keitum NH 02 01 (Pakage 2) huamchin Km 65-125 huamchhung cheithat hna an thawh mek a kawng chhuat chhia/khuar siamthat (Pot Hole Repairing) an kalpui mek chu hun tiam chhungin an zo hman dawn leh dawn loh bakah hmanrua an hman te vawiin khan a hmunah kalin an zirchiang/endik leh.

Kawngpui tha leh tlo Lirthei tana tlan nuam tura chak leh rang zawka kawng siamthat hna thawh anih theih nan leh an kawng siamna hmanrua pawh tha leh tlo tur ngei hmang turin kawng siamtute chu an ngen leh a, Inspection Team te chuan tuna lung an hman chu duthusam a chang tha ni chiahlo mah se, tun dinhmunah chuan a tha tawk thovah an ngai a, lung chang chauh hmang tura an chah bakah he kawng hi fur ruahtui tlak zawh lama Metal hna thawh that leh khawih that leh vek tur a anih thu an hrilh bawk.

NH02 Package - 2, Baktawng Mualkawi Via Serchhip By Pass Road to Keitum inkar kawng siamtu KRAM Infracon Pvt. Ltd. te hnathawh hi kumin fur chho ah hian repair ngaiin hmun tamtak a chhia a, kawngchhuat khuar hnawh dan fello leh lung hman quality a tha tawk lo a, kawng khuar hnawh dan pawh uluk lehzual turin an chah, kawng siamtu Contractor te pawhin chak leh rang zawk a hmanrua (materials) leh khawl te an ngaihtuah belh chhoh mek thu an sawi.

Kawng siam mek endiktu Inspection Team te hi Chawngthu Lalrinhlua SDC chuan hovin, PWD Serchhip Division SDO Lalrinhlua bakah Sub-Hqrs. YMA Vice President Lalrammuana leh a thawhpuite, Serchhip District MJA President Kapliana Pachuau leh a thawhpuite, Serchhip Joint VC aiawhin Secretary Lalrinmawia Khiangte leh Kram Infracon Pvt.Ltd. General Manager Ayush Tiwari leh an Public Relation Officer(PRO) Lalhruaitluanga te an tel a ni.