Tun season-ah Arsenal chuan ni 247 zet Premier League chung ber an luah hman a, tunah erawh Manchester City hnuaiah an awm ta a, tun season-ah ni 16 chiah hmahruaitu la ni ve zawk hian nomawi an hnaih zawk mek thung.

Ni e, mi tam zawkin Arsenal hian an sawi fo, ‘season leh’ an nghah a ngai leh dawn niin an ngai thup tawh a; mahse, boss Mikel Arteta erawh a la beidawng ve lo, ‘season-a a nuam lai ber’ an la thleng dawn chauh niin a sawi.

Pathianni khan City hian 2-1 a Fulham hnehin Gunners hmahruaina an chhuhsak a, vawi khatin an la khel tlem zawk bawk.

Vawi li a zawna a team chakpui zo lotu, Arteta hian Thawhlehni zana Chelsea an hmachhawn hunah ‘a dika thil kalpui’ a duh tih a sawi.

“Inkhelh tur vawi nga kan la neih avangin Premier League hi kan la chang thei a, thil tam tak a la thleng thei,” a ti.

“Ka thlir vang vang hian, a la tawp lo a ni. Kan kutah chuan a awm tawh lo ngei a, tuna kan kuta awm mek chu kan inkhelh turte a ni a, chu chu lak kan tum a, a bak chu City kuta dah a ni.

“Kar hmasaa thil thlengte chu theihnghilhin inzir nan kan hmang ang a, kan khelh hmabak lam kan thlir a ni,” a ti.

Nilaini zana Nottingham Forest-in Brighton an hneh avang khan Arsenal hian season lehah Champions League an khel dawn tih a chiang tawh a, 2016-17 hnua Europe intihsiakna sanga an inlan leh vawi khatna tur a ni.

Arteta chuan, “Ka inchhuang a, he club-a Champions League football ko kir leh a nih theih nana tha thawhtu zawng zawngte chungah ka lawm a. Kan lawm em em chungin Champions League chauh hi a tawk lo va, a bak kan duh a ni,” tiin English champion nih ngei chu a la tum hle.

Arsenal hian Thawhlehni zanah Chelsea an hmachhawn dawn a, an chak chuan City hi an lehpel leh nghal dawn a; mahse, khelh hnihin an khel tam zawk thung ang.